राष्ट्रिय भारोत्तोलन च्याम्पियनसिपमा कृष्ण कला विष्टको तीन कीर्तिमान
२४ पुस, काठमाडौं । नेपाल भारोत्तोलन संघको आयोजनामा भएको २६औं पुरुष तथा ११औं महिला राष्ट्रिय भारोत्तोलन च्याम्पियनसिपमा पहिलो दिन कृष्णकला विष्टले नयाँ राष्ट्रिय कीर्तिमान बनाएकी छन् ।
नेपाल पुलिस क्लबकी उनले स्न्याच, क्लिन एण्ड जर्की र कुल गरी तीन वटा कीर्तिमान बनाएका हुन् ।
भक्तपुरको थिमीस्थित थिमी ब्याङ्केटमा भएको प्रतियोगितामा विष्टले महिला सिनियर ४९ केजी तौल समूहमा उनले स्न्याचमा ५९, क्लिन एण्ड जर्कमा ७७ केजी र कूलमा १३६ केजी भार बहन गर्दै नयाँ कीर्तिमान बनाइन् ।
यस तौल समूहमा नेपाल आर्मीकी सृजना तामाङले ११० केजी भार बहन गर्दै दोस्रो स्थान हासिल गरिन् भने एपीएफकी सबिना श्रेष्ठले ८४ केजी उठाएर तेस्रो भइन् ।
प्रतियोगिताको मंगलबार नेपाली कंग्रेसका नेता एवं पूर्व उपप्रधानमन्त्री विमलेन्द्र निधिले उद्घाटत गरेका थिए । निधिले खेलमा जस्तै राजनीतिमा पनि नियम पालना गर्नुपर्ने र गल्ती गरेपनि सच्चिने अवसर दिनुपर्ने बताए ।
अन्तर्राष्ट्रिय भारोत्तोलन महासङ्घ, एसियन भारोत्तोलन महासङ्घ र नेपाल भारोत्तोलन सङ्घको नियम अनुसार सञ्चालित हुने प्रतियोगिता मध्यपुर ठिमीमा पुस २६ गतेसम्म सञ्चालन हुनेछ ।
प्रतियोगितामा विभागीय टोली र देशभरका गरी दुई सय ५० खेलाडीको सहभागिता रहेको सङ्घका अध्यक्ष रामकृष्ण श्रेष्ठ (बोस) ले जानकारी दिए ।
कीर्तिमानी खेलाडी सम्मानित
नेपाल भारोत्तोलन संघले १९औं एसियाडमा तीन सय केजी भन्दा माथिको भार बहन गर्ने दुई कीर्तिमानी खेलाडी र युथ एसियन च्याम्पियनसिपमा पदक विजेता खेलाडीसहित ६ जनालाई मंगलबारै सम्मान गरेको छ ।
१९औं एसियाडमा ३०३ केजी भार बहन गरेका सागर भण्डारी र ३०१ केजी भार बहन गरेका विशाल सिंह विष्टलाई सम्मान गरिएको हो । यस्तै युथ एसियन च्याम्पियनसिपमा कांस्य पदक जितेका हेमन्त पाललाई पनि सम्मान गरियो ।
यसैगरी १९औं एसियाडका प्रशिक्षक जीवन गौतम र म्यानेजरमा राम सुन्दर श्रेष्ठ तथा अर्का प्रशिक्षक सञ्जय महर्जनलाई सम्मान गरिएको हो ।
– यस समाचारको श्रोत : Online Khabar हो ।