फागुन १२ गतेबाट पाँचथर गोल्डकप हुने, दर्शकको समेत बीमा
१० माघ, पाँचथर । पाँचथर गोल्डकपको चौथो संस्करण फागुन १२ गतेबाट हुने भएको छ ।
आयोजक पाँचथर क्लबले बुधबार फिदिममा पत्रकार सम्मेलन चार वर्षको विश्रामपछि यसपालि प्रतियोगिता हुन लागेको जानकारी दिएको हो ।
अन्तिम पटक २०७६ को चैतमा भएको यो प्रतियोगिता त्यसपछि विभिन्न कारणले रोकिंदै आएको थियो ।
आयोजकले यसपटक प्रतियोगिता फागुन १२ गतेबाट १९ गतेसम्म हुने जानकारी दिएको छ । प्रतियोगिताका खेल फिदिम माविको खेलमैदानमा हुनेछ ।
८ टिमको सहभागिता हुने प्रतियोगितामा एक अन्तर्राष्ट्रिय टिम पनि समावेश हुने आयोजकले जनाएको छ । प्रतियोगितामा एक टिम आयोजकको हुनेछ । प्रतियोगितामा सहभागी टिमहरुको टुङ्गो लाग्न केही समय लाग्ने आयोजक क्लबका सचिव योगराज सेढाइले जानकारी दिए ।
उनका अनुसार मोफसलका झापा, मोरङ सहित ए डिभिजन लिग खेल्ने टिम र एनएसएल खेल्ने टोलीहरुलाई सहभागी गराउने प्रयास भइरहेको छ ।
प्रतियोगिताको विजेताले ५ लाख ५ हजार, दोस्रोले दुई लाख २ हजार रुपैयाँ पुरस्कार पाउनेछन् ।
सर्वोत्कृष्ट खेलाडी, सर्वाधिक गोलकर्ता, उत्कृष्ट गोलकिपर, डिफेन्डर, मिडफिल्डर र उदीयमान खेलाडीलाई पुरस्कृत गरिने आयोजकले जनाएको छ ।
प्रतियोगितामा सहभागी खेलाडी, अफिसियलका साथै २०० जना दर्शकको समेत सामूहिक बीमा गरिएको आयोजकले जानकारी दिए ।
व्यवस्थित खेलमैदान नभएको र बाँसको अस्थायी प्यारापिटबाट दर्शकले खेल हेर्नुपर्ने भएकाले दर्शकको समेत बीमा गरिने आयोजकले जनाएको छ ।
– यस समाचारको श्रोत : Online Khabar हो ।