फाल्डो जुनियर गल्फ विजेता सदभावलाई स्वागत
७ मंसिर, काठमाडौं । यूएईको आबुधाबीमा भएको २८औं संस्करणको फाल्डो जुनियर टुर युरोप ग्रान्ड फाइनल अन्तर्गत यु–२१ तर्फको उपाधि विजेता नेपालका नम्बर एक एमेच्योर गल्फर सदभाव आचार्य स्वदेश फर्किएका छन् ।
सदभावलाई शुक्रबार त्रिभुवन अन्तर्राष्ट्रिय विमानस्थलमा राष्ट्रिय खेलकुद परिषदका सदस्य सचिव टंकलाल घिसिङ, नेपाल गल्फ संघका अध्यक्ष टासी घले तथा संघका पदाधिकारीहरुले स्वागत गरे ।
नेपाली खेलाडीले फाल्डो सिरिज अन्तर्गत ग्रान्ड फाइनलमा उपाधि जितेको यो पहिलो पटक हो । सदभाव ओभरअलतर्फ दोस्रो भएका थिए ।
आबुधाबीस्थित अल आइन इक्वेसटेरियन, सुटिङ एण्ड गल्फ क्लबमा भएको प्रतियोगितामा समग्रमा ५–अन्डर २०५ स्कोर गर्दै सदभावले उपाधि जितेका हुन् । उनले डेनमार्कका भिक्टोर कोफोड उसलेनलाई २ स्ट्रोकले हराउँदै पहिलो पटक नेपाललाई उपाधि जित्दै इतिहास बनाए ।
सदभावसँगै जयबीर आचार्य र आईसटिना टण्डनले पनि सहभागिता जनाएका थिए । उनीहरूले भने उपाधि जित्न सकेनन् । गत अप्रिलमा नेपालमा भएको फाल्डो जुनियर टुर नेपाल च्याम्पियनसिपमा आ–आफ्नो क्याटगरीमा पहिलो हुँदै उनीहरू ग्रान्ड फाइनलमा छनोट भएका थिए ।
छ पटकका मेजर टाइटल विजेता सर निक फाल्डोले यो प्रतियोगिता आयोजना गरेका हुन् । यो प्रतिष्ठित जुनियर प्रतियोगिता आयोजनाका लागि आर एण्ड ए, डिपी वल्र्ड टुर र लेडिज युरोपियन टुरले सहयोग गरेको छ । युएईमा युरोप, मिडल इस्ट, र एसियाबाट ७० जुनियर गल्फरले उपाधिका लागि प्रतिस्पर्धा गरेका थिए।
यो प्रतियोगिताबाट एमेच्योर गल्फ वरियतामा अंक जोडिने छ । साथै २०२५ को एसिया ग्रान्ड फाइनल, जुनियर दुबाई डेसर्ट क्लासिक र अनिका इनभिटेसनल युरोपको छनोट प्रतियोगिता पनि हो ।
– यस समाचारको श्रोत : Online Khabar हो ।