फिल्म ‘डोरी’ निर्माण हुने, शीर्ष भूमिकामा प्रवीण खतिवडा, शिशिर बाङ्देल
काठमाडौं । जी सेभेन प्रोडक्सनको ब्यानरमा फिल्म ‘डोरी’ निर्माण हुने भएको छ । हरर, थ्रिलर, एक्सन र कमेडी जनरामा बन्न लागेको फिल्मलाई अरुण लामाले निर्देशन गर्नेछन् ।
यसअघि विभिन्न लघुफिल्म र वृत्तचित्र निर्देशन गरिसकेका लामाको यो पहिलो फिचर हुनेछ । परिवारको आर्थिक बोझ हल्का गर्न जीवनमा जोखिमपूर्ण निर्णय लिने संघर्षशिल युवाको कथामा फिल्म बन्न लागेको जनाइएको छ ।
उनका अनुसार फिल्ममा हाँसो, त्रास र असफलतासहितको संघर्षलाई रोचक तरिकामा प्रस्तुत गरिने भएको छ । फिल्ममा प्रवीण खतिवडा, शिशिर बाङ्देल, कविता आले, राज पौडेल, विशाल राई, मिलन राई, नूतन र वीरेन्द्र सिंह कुशवाहा लगायतको अभिनय हुनेछ ।
नायिका भूमिकाको लागि कलाकार चयन बाँकी छ । पटकथा लामाकै हुनेछ । मनोज पण्डित स्क्रिप्ट डाक्टरको रुपमा छन् । निर्माताको नाम ‘मिस्टर एक्स’ र कार्यकारी निर्माता राज थापा छन् । सौरभ लामाको छायांकन र राजु तामाङको एक्सन कोरियोग्राफी हुनेछ ।
प्रदर्शन सन् २०२५ गर्ने जनाइएको छ ।
– यस समाचारको श्रोत : Online Khabar हो ।