बच्चालाई ग्लोबल आईएमई बैंक ‘जुनियर एप’, सुविधा के छ ?

२२ असोज, काठमाडौं। बालबालिका लक्षित गर्दै ग्लोबल आईएमई बैंकले ‘जुनियर एप’ सञ्चालनमा ल्याएको छ । यो एपले बालबच्चालाई अभिभावकसँग जोड्नुका साथै उनीहरूका क्रियाकलाप बुझ्न र डिजिटल कारोबार गराउन पनि सहयोगी छ ।

‘विशेषतः १२ देखि १७ वर्षसम्म उमेरका बालबालिकालाई लक्षित गर्दै यो एप ल्याएका हौं,’ बैंकका बैंकिङ ट्रान्जेक्सन सेल्स एन्ड बिजनेस प्रमुख प्रकाश पौडेलले भने । यो एप अभिभावकमार्फत नै नियन्त्रित र व्यवस्थित हुने भएकाले अभिभावकलाई बालबालिकाका क्षमता, क्रियाकलाप बुझ्न पनि मद्दत पुग्ने उनले बताए ।

पछिल्लो समय स्कुलहरूले पनि आफ्ना एपमार्फत बालबालिकालाई अध्ययन गराउने, होमवर्क गराउने, सिप सिकाउने कार्य गर्दै आएकोमा ग्लोबल आईएमईले डिजिटल्ली बैंकिङ सिकाउने प्रयास गरेको उनको भनाइ छ । यो एप बालबालिकालाई चलाउन सहज छ । यसको प्रयोग पनि बढ्दै गएको छ ।

‘हामीले घरबाहिर डिजिटल कारोबार गर्न थालिसक्यौं, तर घरभित्रै बालबालिकासँग नगद लेनदेन हुने गरेको छ, यो एपले घरभित्रै डिजिटिल लेनदेन गराउँछ,’ पौडेलले भने ।

एप कसरी सञ्चालन गर्ने ?

यो एप चलाउन बालबालिका बैंकमा आउनुपर्दैन, बालबालिकाको बैंक खाता खोल्नु पनि पर्दैन। तर, अभिभावकको भने बैंकमा खाता हुनुपर्छ ।

अभिभावकसँग ग्लोबल आईएमई स्मार्ट प्लस एप हुनुपर्छ। सोही एपमा बैंकको ‘ग्लोबल जुनियर’ अप्सन उपलब्ध छ । त्यसमै क्लिक गरेर अभिभावकले आफ्नो बच्चालाई दर्ता गराउन सक्छन् ।

त्यसमा नाम, जन्म मिति र जन्म प्रमाणित कुनै कागज (जन्मदर्ता वा अस्पतालको कुनै रेकर्ड) अपलोड गरेपछि बच्चालाई एपमा दर्ता गर्न सकिन्छ । त्यसपछि बच्चाको फोनमा प्लेस्टोर वा आईओएसमार्फत ग्लोबल जुनियर एप डाउनलोड गर्ने बित्तिकै अभिभावकको मोबाइलबाटै सक्रिय गराउन सकिन्छ ।

एपमा के सुविधा छ ?

एपमार्फत नै बालबालिकाले अभिभावकसँग स्टेसनरी सामग्री किन्न, खाजा खर्च वा अन्य कामका लागि पैसा माग्न (रिक्वेस्ट गर्न) सक्छन्। त्यसपछि अभिभावकले रिक्वेस्ट ‘ओके’गरेपछि अटोमेटिक बच्चाको एपमा मागिएको पैसा जम्मा हुन्छ ।

एपमा जम्मा भएको पैसामा बालबालिकाले बचतसरह ब्याज पनि पाउने पौडेलले बताए। अभिभावकले बच्चाको एपमा भएको पैसा हेर्न पनि सकिन्छ । त्यस्तै अभिभावकले दिने दक्षिणा पनि यही एपमा पठाइदिन सकिन्छ ।

बच्चाले त्यो पैसा एपमार्फत क्यूआर गरी विभिन्न खर्च गर्न सक्छन्। बच्चाको मोबाइल हरायो वा पिन बिर्सिएमा अभिभावकले नै रिसेट गरिदिन सक्छन् ।

त्यतिमात्र होइन, बालबालिकालाई उत्प्रेरणा गर्न एपमा अन्य गेम (खेल) पनि उपलब्ध छन् । एपमार्फत विभिन्न सन्देश, तस्वीर पोस्ट गरी अभिभावकलाई जानकारी गराउन सकिन्छ ।

अबका दिनमा एपलाई एजुकेसन हबका रुपमा विकास गर्दै लगिने पौडेलले बताए । उनका अनुसार उमेर अनुसार उपयोगी र जानकारी मूलक शिक्षा एपमा उपलब्ध गराइने छ ।

– यस समाचारको श्रोत : Online Khabar हो ।