इंग्ल्याण्डका स्टेफन इस्किनाजीले काठमाडौं गुर्खाजबाट एनपीएल खेल्ने

२० कात्तिक, काठमाडौं । इंग्ल्याण्डका विकेटकिपर ब्याटर स्टेफेन इस्किनाजीले काठमाडौं गुर्खाजबाट नेपाल प्रिमियर लिग (एनपीएल) खेल्ने भएका छन् ।

काठमाडौं गुर्खाजले मंगलबार इस्किनाजीलाई आफ्नो तेस्रो विदेशी खेलाडीको रुपमा अनुबन्ध गरेको जनाएको छ ।

दक्षिण अफ्रिकामा जन्मिएका ३० वर्षीय इस्किनाजीले त्यसपछि अष्ट्रेलियाको उमेर समूहमा खेलेका थिए । तर हाल उनी इंग्लिस खेलाडी बनिसकेका छन् । पर्थ स्कोर्चर्सका लागि बिस बाग लिग खेलेका इस्किनाजीले भाइटालिटी टी-२० ब्लास र दी हन्ड्रेड क्रिकेट पनि खेलेका छन् ।

इस्किनाजले सबैखाले गरी ११० टी-२० खेल खेलेका छन् । जसमा उनले ३ हजार १०५ रन बनाएका छन् । उनको उच्च स्कोर १०२ रन हो । यस्तै उनले ८८ फर्स्ट क्लास र ३० लिस्ट ए क्रिकेट पनि खेलेका छन् ।

टी-२० ब्लास्ट र बिग बास लिगको अनुभव भएका इस्किनाजीको आगमनले काठमाडौं गुर्खाज टिमलाई बलियो बनाउने टिमको विश्वास छ ।

काठमाडौंले अनुबन्ध गरेको इस्किनाजी तेस्रो विदेशी खेलाडी हुन् । यसअघि काठमाडौंले नेदरल्याण्ड्सका युवा ओपनर ब्याटर माइकल लेभिट र नामिबियाका कप्तान जेरार्ड एरासमसलाई अनुबन्ध गरिसकेको छ ।

काठमाडौंले अब एक विदेशी खेलाडी अनुबन्ध गर्न बाँकी छ । करण केसी मार्की खेलाडी रहेको काठमाडौं गुर्खाजको प्रशिक्षकमा बसन्त शाही ठकुरी छन् ।

क्यानको आयोजनामा मंसिर १५ देखि पुष ६ गतेसम्म काठमाडौंमा हुने एनपीएलमा ८ टिमले प्रतिस्पर्धा गर्नेछन् ।

– यस समाचारको श्रोत : Online Khabar हो ।