बढुवा सकस टार्न डीआईजीको दरबन्दी थप्ने प्रस्ताव
२ मंसिर, काठमाडौं । प्रहरी नायव महानिरीक्षक (डीआईजी) बढुवामा सकस भएपछि नेपाल प्रहरीमा दरबन्दी थप्ने प्रयास सुरु भएको छ ।
प्रहरी प्रधान कार्यालयको योजना तथा अन्वेषण निर्देशनालयले जनपदतर्फ डीआईजीमा तीन दरबन्दी थप गर्नुपर्ने प्रस्ताव गृह मन्त्रालयमा पठाएको छ ।
जनपदतर्फ नेपाल प्रहरीमा २० डीआईजीको दरबन्दी छ । यसमध्ये ८ पद रिक्त छ । यसका लागि तीन ब्याचका दर्जन प्रहरी वरिष्ठ उपरीक्षक (एसएसपी) बढुवाका लागि प्रतिस्पर्धामा छन् ।
कसलाई बढुवा गर्ने भन्ने सकस भएपछि दरबन्दी थप गरेर बढुवा गर्ने तयारी प्रहरी हेडक्वार्टरले पठाएको छ ।
प्रहरी प्रधान कार्यालयले त्रिभुवन अन्तर्राष्ट्रिय विमानस्थल सुरक्षा कार्यालय, नेपाल प्रहरी शिक्षालय (भरतपुर तालिम केन्द्र) र काठमाडौं उपत्यका ट्राफिक प्रहरी कार्यालयमा डीआईजीको दरबन्दी थप गर्नुपर्ने प्रस्ताव गरेको हो । एसएसपीको दरबन्दी रहेका यो तीन वटै कार्यालयमा अहिले पनि डीआईजी खटाउने गरिएको छ ।
प्रहरी हेडक्वार्टरबाट आएको प्रस्ताव गृह मन्त्रालयले बिहीबार नै स्वीकृतिका लागि अर्थ मन्त्रालयमा पठाएको छ । ‘गत बिहीबार दरबन्दी थपको प्रस्ताव अर्थमा पठाइएको हो, तर अहिलेसम्म त्यसबारे कुनै जानकारी आइसकेको छैन’, गृह स्रोतले भन्यो ।
अर्थले स्वीकृत दिएमा फेरि स्वीकृतिका लागि कानुन मन्त्रालय पठाइनेछ । त्यसपछि लोकसेवा आयोगबाट समेत स्वीकृत भएको अवस्थामा गृहमन्त्रीले उक्त प्रस्ताव मन्त्रिपरिषदमा लैजान्छन् । मन्त्रिपरिषद्बाट स्वीकृत भएपछि बल्ल डीआईजीको दरबन्दी थप हुनेछ ।
८ डीआईजीका लागि तीन ब्याचका अधिकृतको प्रतिस्पर्धा
नेपाल प्रहरीमा अहिले ८ डीआईजीको दरबन्दी रिक्त छ । प्रहरीको केन्द्रीय अनुसन्धान ब्यूरो (सीआईबी)मा दरबन्दी भई त्रिभुवन अन्तर्राष्ट्रिय विमानस्थल सुरक्षा कार्यालयमा कार्यरत डीआईजी किरण राणा एआईजीमा बढुवा सिफारिस भएपछि यो पद रिक्त थियो ।
त्यसअघि नै डीआईजी यज्ञविनोद पोखरेल १४ असोजमा ५६ वर्षे उमेर हदका कारण अनिवार्य अवकाशमा गएका थिए । १६ भदौमा बागमती प्रदेशका डीआईजी बिष्णुकुमार केसी पनि ५६ वर्षे उमेर हदकै कारण अनिवार्य अवकाशमा गएका थिए ।
रामदत्त जोशी एआईजीमा बढुवा भएपछि डीआईजीको एउटा दरबन्दी खाली छ । २१ असारमा डीआईजी पोषराज पोखरेलले अवकाश पाए । उनको ठाउँमा पनि डीआईजीको दरबन्दी खाली छ ।
११ कात्तिकमा प्रहरी शिक्षालय भरतपुरका निर्देशक डीआईजी राजेशनाथ बाँस्तोला अवकाशमा गएपछि उनको ठाउँमा पनि डीआईजीको पद रिक्त छ ।
त्यसैगरी केही दिनअघि मात्रै बुद्धिराज गुरुङ र केदार ढकाल एआईजीमा बढुवा भएपछि थप दुई पद रिक्त छ । २१ असारदेखि अहिलेसम्म रिक्त डीआईजीको संख्या ८ पुगेको छ ।
८ डीआईजीमा बढुवाका लागि हालका प्रहरी महानिरीक्षक (आईजी) का ब्याची एसएसपीसहित तीन ब्याचबीच प्रतिस्पर्धा छ ।
२०५१ चैत ५ मा प्रहरी निरीक्षक (इन्सपेक्टर) मा भर्ना भएकाहरु धु्रवराज राउत, भोलाबहादुर रावल र गणेश चन्द डीआईजी बढुवाको प्रतिस्पर्धामा छन् ।
२०५३ सालमा राष्ट्रिय अनुसन्धान विभागको प्रहरी निरीक्षकमा भर्ना भएर प्रहरीमा स्थानान्तरण भएको ब्याच र २०५४ मा नेपाल प्रहरीकै इन्सपेक्टरमा भर्ना भएको ब्याचका अधिकृतहरु डीआईजी बढुवाको प्रतिस्पर्धामा छन् ।
२०५३ को टोलीबाट सिद्धिबिक्रम शाह, सुशीलसिंह राठौर, उमाप्रसाद चर्तुवेदी, हिमालयकुमार श्रेष्ठ, डम्बरबहादुर बिक, ओमबहादुर राना डीआईजी बढुवाको प्रतिस्पर्धामा छन् ।
२०५४ को ब्याचबाट ईश्वर कार्की, राजेन्द्रप्रसाद भट्ट, दिनेशकुमार आचार्य, अरुण पौडेल र गोविन्द थपलिया डीआईजीको प्रतिस्पर्धामा छन् ।
यसअघि २०५४ को ब्याचका दानबहादुर कार्की, डा. मनोज केसी र राजन अधिकारी ४ जेठ २०८१ मा राष्ट्रिय अनुसन्धानबाट आएको २०५३ को ब्याच र २०५१ को ब्याचलाई समेत उछिन्दै बढुवा भएका थिए ।
त्यसैगरी माधवप्रसाद श्रेष्ठ, दीपेन्द्र घर्ती क्षेत्री, दीपक रेग्मी, दिलिपसिंह देउवा, विनोद घिमिरे, सुदर्शनप्रसाद कोइराला, दीपककुमार बस्नेत, जयराम सापकोटा, सुरेन्द्रबहादुर गुरुङ, सञ्जय शर्मा दास, शारदाप्रसाद चौधरी पनि डीआईजी बढुवाको प्रतिस्पर्धामा छन् ।
प्राविधिकतर्फ पनि दरबन्दी थप्ने प्रस्ताव
प्रहरी प्रधान कार्यालयले प्राविधिकतर्फ पनि दुई डीआईजीको पनि दरबन्दी थप्ने प्रस्ताव गरेको छ । प्रहरी हेडक्वार्टर स्रोतका अनुसार प्राविधिकतर्फ केन्द्रीय विधि विज्ञान प्रयोगशाला र सञ्चार निर्देशनालयमा दरबन्दी थपका लागि प्रस्ताव गरिएको हो ।
अहिले विधि विज्ञानमा एसएसपी राकेश सिंह कार्यरत छन् भने सञ्चारमा एसएसपी गोपालप्रसाद रेग्मी छन् । उनीहरुको बढुवाका लागि प्राविधिकतर्फ दुई डीआईजीको दरबन्दी थप गर्न लागिएको हो ।
यसअघि केन्द्रीय साइबर ब्यूरो र नेपाल प्रहरी केनाइन कार्यालयमा दुई डीआईजीको दरबन्दी थपिएको थियो ।
एसएसपी नवीन्द अर्याल र डा. देउती गुरुङको बढुवाका लागि थप गरिएका उक्त उनीहरुको अवकाशसँगै खारेज भयो ।
अहिले भने विधि विज्ञान र सञ्चारमा स्थायी दरबन्दी थप गर्ने प्रस्ताव गरिएको छ । प्रहरीमा प्राविधिकतर्फ अहिले ७ डीआईजी छन् ।
प्रस्ताव गरिएको डीआईजी दरबन्दी थप भएको अवस्थामा ९ पुग्नेछ । जनपथ र प्राविधिकतर्फ प्रस्ताव अनुसार दरबन्दी थप भए डीआईजीको संख्या ३२ पुग्नेछ ।
– यस समाचारको श्रोत : Online Khabar हो ।
