बसिर चम्किएपछि तिरहुत टाइगर्स सप्तरी प्रिमियर लिगको फाइनलमा
२६ जेठ, काठमाडौं । तिरहुत टाइगर्स सप्तरीको राजविराजमा जारी राजविराज मेयर कप सप्तरी प्रिमियर लिगको फाइनल पुगेको छ।
शनिबार सम्पन्न रोमाञ्चक पहिलो क्वालिफायरमा छिन्नमस्ता लायन्सलाई ४ रनले पराजित गर्दै तिरहुत टाइगर्सले फाइनलमा स्थान पक्का गर्यो ।
पराजित छिन्नमस्ताले अब फाइनल प्रवेशको लागि दोस्रो मौका पाउनेछ। आइतबार दोस्रो क्वालिफायरमा छिन्नमस्ता र कन्चनरुप राइनोज बीच प्रतिस्पर्धा हुनेछ। शनिबार सम्पन्न इलिमिनेटरमा कन्चनरुपले सनराइज तिलाठी कोइलाडीलाई पराजित गरेको हो। पराजित हुँदै तिलाठी कोइलाडी प्रतियोगिताबाट बाहिरिएको छ ।
पहिलो क्वालिफायर अन्तर्गत पब्लिक विन्देश्वरी मैदानमा तिरहुत टाइगर्सले दिएको १६८ रनको लक्ष्य पछ्याएको छिन्नमस्ताले पुरै २० ओभरमा ८ विकेट गुमाएर १६३ रन मात्र बनायो ।
सुमित नेवारले अविजित ७२ रन बनाए पनि जितको लागि पर्याप्त हुन सकेन। सुमितले ३७ बलमा ४ चौका र ६ छक्का मद्दतले अविजित ७२ रन बनाएका थिए । मयन यादवले ३६ तथा विकास दासले २३ रनको योगदान दिए।
बलिङतर्फ तिरहुतका अनिल यादवले ४ ओभरमा २२ रन खर्चिएर सर्वाधिक ४ विकेट लिए । रुपेश सिंहले २ तथा दिपेश कंडेलले १ विकेट लिए। टस जितेर ब्याटिङ गरेको तिरहुत टाइगर्सले २० ओभरमा १६७ रनमा सबै विकेट गुमायो।
तिरहुतको लागि खेलको प्लेयर अफ द म्याच समेत घोषित भएका बसिर अहमदले सर्वाधिक ७४ रन योगदान दिए । उनले ४२ बलमा ९ चौका र ३ छक्का प्रहार गरे। यस्तै अमित यादवले ३४ बलमा ४ चौका र २ छक्काको मद्दतमा ४२ रन बनाए ।
बलिङतर्फ छिन्नमस्ता लायन्सका फिर्दोस अन्सारीले सर्वाधिक ३ विकेट लिए । ४ ओभर बलिङ गर्दा उनले ३१ रन खर्चिए। मोहम्मद सोहेल र भीम सार्कीले समान २ विकेट तथा विशाल पटेलले १ विकेट लिए।
शनिबार नै भएको इलिमेनेटरमा सनराइज एघार तिलाठी कोइलाडीले दिएको १२५ रनको लक्ष्य कञ्चनरुप राइनोजले १५.१ ओभरमा ७ विकेट गुमाएर पुरा गर्यो ।
कञ्चनरुपका लागि ओपनर शुभ कंसाकारले सर्वाधिक ७१ रन बनाए । प्लेयर अफ द म्याच घोषित उनले ४० बलमा ५ चौका र ७ छक्का प्रहार गरे । अरनिको यादवले २६ तथा रासिद खानले अविजित १० रन बनाए। बलिङतर्फ तिलाठी कोइलाडीका दिपेश सरदारले ३, नारायण जोशीले २ तथा तृत राजदास र विशाल सुश्लिङले १/१ विकेट लिए।
टस हारेर ब्याटिङ गरेको सनराइज एघार तिलाठी कोइलाडीले १५.२ ओभरमा सबै विकेट गुमाएर १२४ रन बनाएको थियो।
तिलाठी कोइलाडीको लागि तृतराज दासले सर्वाधिक ५१ रनको योगदान दिए जुन क्रममा उनले २८ बलमा ५ चौका र ४ छक्का प्रहार गरे।
अभिषेक तिवारीले ३० तथा विशाल सुस्लिङले १२ रन बनाए । विनोद भण्डारीले ६ रन मात्र बनाउन सके। बलिङतर्फ कञ्चनरुप राइनोजका दिनेश अधिकारीले सर्वाधिक ३ विकेट लिए जुन क्रममा ३.२ ओभरमा १५ रन खर्चिए।
राहुल मण्डलले २ विकेट लिंदा चित्रबहादुर विष्ट, उमेश चौधरी र अरनिको यादवले १/१ विकेट लिए ।
– यस समाचारको श्रोत : Online Khabar हो ।