बाढीको क्षति हेर्न गएका मन्त्रीहरूलाई कार्पेट र सोफा
काठमाडौं। सिन्धुलीको बाढी प्रभावित क्षेत्र हेर्न पुगेका मन्त्रीहरूलाई त्यहाँका प्रशासन तथा कर्मचारीहरूले कार्पेट र सोफामा स्वागत गरेका छन्।
सिन्धुली जिल्लामा बाढी र पहिरोले पुर्याएको क्षति हेर्न संघीय सरकारका तीनजना मन्त्रीहरू मंगलबार त्यहाँ पुगेका थिए। क्षतिपछि १० दिनपछि उनीहरू त्यहाँ पुगेका हुन्।
गृहमन्त्री रमेश लेखक, भौतिक पूर्वाधार तथा यातायातमन्त्री देवेन्द्र दाहाल र रक्षामन्त्री मानवीर राईसहितको टोली खुर्कोटबाटा चौतारा गएका छन्।
उनीहरूले सुनकोशी नदीमा आएको बाढीले बगाएको सिन्धुली–रामेछाप जोड्ने खुर्कोट पुल र बाढी प्रभावित खुर्कोट बजार क्षेत्रको अवलोकन गरेका थिए।
रामेछापतर्फको ५१ मिटर बगेको बेलीब्रिज यातायात सञ्चालनका लागि नेपाली सेनाले प्रारम्भिक काम थालनी गरिसकेको छ।
बाढीपहिरोबाट जिल्लामा भएको क्षति तथा तत्काल भइरहेको सडक पूर्वाधारको पुनःनिर्माण, उद्धार र राहतका सम्बन्धमा स्थानीय जनप्रतिनिधि, प्रमुख जिल्ला अधिकारी लीलाप्रसाद शर्मा, जिल्ला प्रहरी कार्यालयका प्रमुख प्रहरी उपरीक्षक गोविन्दराज काफ्लेलगायतले जानकारी गराएका थिए।
– यस समाचारको श्रोत : देश – PrawasKhabar हो ।