बायर्न म्युनिखमाथि एस्टन भिल्लाको जित

१७ असोज, काठमाडौं । युरोपियन च्याम्पियन च्याम्पियन्स लिगको लिग चरणमा प्रिमियर लिग क्लब एस्टन भिल्लाले जर्मन महाराथी बायर्न म्युनिखमाथि शानदार जित हात पारेको छ ।

बुधबार राति भएको खेलमा भिल्लाले बायर्नलाई १-० ले पराजित गरेको हो ।

घरेलु मैदान भिल्ला पार्कमा भएको खेलमा एस्टन भिल्लाका लागि जोन डुरानले ७९औं मिनेटमा निर्णायक गोल गरे ।

च्याम्पियन्स लिगमा भिल्लाको यो लगातार दोस्रो जित हो । पहिलो खेलमा भिल्लाले योङ व्याजलाई पराजित गरेको थियो ।

लगातार दोस्रो जितपछि ६ अंक जोडेको भिल्ला छैटौं स्थानमा छ । पहिलो हार व्यहोरेको बायर्न भने २ खेलबाट ३ अंकसहित १५औं स्थानमा छ ।

यसपटक फरक शैलीमा भइरहेको च्याम्पियन्स लिगमा ३६ टोलीले प्रतिस्पर्धा गरिरहेका छन् ।

– यस समाचारको श्रोत : Online Khabar हो ।