विश्वकप छनोटमा नेपालको बिर्सनलायक प्रदर्शन

२ असार, काठमाडौं । फिफा विश्वकप २०२६ को एसियाली छनोटको दोस्रो चरणबाटै नेपाल बाहिरियो । नेपालले खेलेका ६ मध्ये कुनै खेल जित्न सकेन । ५ खेलमा पराजित हुँदा एक खेलमा बराबरी खेल्यो । त्यही बराबरी खेलेको खेलमा मात्र नेपालले गोल गर्न सक्यो ।

कप्तान किरणकुमार लिम्बुको १००औं खेल अनि सञ्जीव विष्ट र जिलेस्पी जंग कार्कीले नेपालका लागि आफ्नो पहिलो गोल गर्नुबाहेक छनोटको दोस्रो चरणमा नेपालका लागि सबै कुरा बिर्सनलायक रह्यो ।

घरेलु मैदानमा खेल्नुपर्ने खेल बाहिर गएर खेल्नुपर्ने अवस्था आउनु, खेलाडी विदेशिने क्रम जारी रहनुजस्ता समस्या आउँदा यसको असर मैदानमा प्रष्ट देखियो ।

नेपाल रहेको समूह एचमा थियो एसियाकै बलियो टिम युएई । त्यसपछिको बलियो बहराइन अनि नेपालकै हाराहारीमा रहेको यमन । छनोट खेलअगाडि नेपालले युएईसँग एक पटक मात्र खेलेको थियो । यस्तै बहराइनसँग नेपालले खेलेकै थिएन ।

नेपालको अपेक्षा थियो कम्तीमा यमनलाई हराउने र घरेलु मैदानमा बहराइनलाई बराबरीमा रोक्ने । समूहको दोस्रो स्थानमा रहन सके विश्वकप छनोटको तेस्रो चरणमा पुग्ने र एएफसी एसियन कप २०२७ को लागि सिधै छनोट हुने लक्ष्य नेपालले राखेको थियो । तर, नेपालको प्रदर्शन त्यो भन्दा धेरै टाढा रह्यो । १ अंक जोडेर समूहको अन्तिममा रहँदै नेपाल विश्वकप छनोटबाट बाहिरियो भने एसियन कपका लागि पनि अर्को एक चरणको छनोट खेल्नुपर्ने छ ।

नेपालले सुरुवाती पाँच खेलमा हार ब्यहोर्दा अन्तिम खेलमा यमन विरुद्ध २-२ को बराबरी खेल्दै १ अंक मात्र जोड्न सफल भएको थियो । त्यस खेलमा सञ्जीव र जिलेस्पीले नेपालका लागि गोल गरेका थिए ।

नेपाली महिला टिमका पूर्व प्रशिक्षक अनन्त थापा नेपालले अपेक्षा गरे भन्दा कमजोर प्रदर्शन गरेको बताउँछन् । ‘विश्वकप छनोटको सबै खेल सरसर्ती हेर्दा हामी अलि राम्रो गर्न सक्थ्यौँ कि भन्ने लाग्छ । हामीले धेरै खेल अवे मैदानमै खेल्नुपर्‍यो’, थापाले अनलाइनखबरसँग भने, ‘अन्तिम खेलमा १ अंक जोडेर हामी सन्तुष्ट हुनुपर्ने अवस्था आयो ।’

थापाले टिममा स्थायित्व नहुँदा नेपालको प्रदर्शनमा एकरुपता हुन नसकेको बताए । यद्यपि छनोट चरणको अन्तिममा यमनविरुद्धको खेलमा नेपालको खेल सुधार भएको उनको भनाइ छ । ‘टिममा स्थायित्व पनि भएन । त्यो सबैभन्दा चुनौती भयो । अन्तिम खेलमा देखाएको जुझारुपन नेपालले सुरुका खेलहरुमा पनि देखाएको भए अर्कै नतिजा आउन सक्थ्यो कि’, उनले भने ।

६ खेलमा २ गोल गर्दा २० गोल खायो

नेपालले दोस्रो चरणको छनोटका ६ खेलमा जम्मा २ गोल मात्र गर्दा २० गोल खायो । नेपालले सबै ६ खेलमै गोल खाएको थियो । एक खेलमा मात्र गोल गरेको थियो ।नेपालले युएई विरुद्ध अवे मैदानमा खेल्दै छनोटको यात्रा सुरु गरेको थियो । तर पहिलो खेलमै नेपाल ४-० ले पराजित भयो ।

त्यसपछि नेपालले घरेलु मैदानमा यमनसँग खेल्यो । नेपालकै स्तरको टिम अनि घरेलु दर्शकको अगाडि खेल्दा नेपालले नतिजा आफ्नो पक्षमा पार्ने अपेक्षा थियो । तर १५ हजार दर्शकमाझ दशरथ रंगशालामा भएको खेलमा नेपाल यमनसँग २-० ले पराजित भयो । नेपालले अंकको खाता खोल्ने अवसर गुमायो ।

त्यसपछि नेपालले घरेलु मैदानमै बहराइनसँग खेल्ने तालिका थियो । तर एसियाली खेलकुद महासंघ (एएफसी) ले दरशथ रंगशालाको अवस्था छनोट खेल खेलाउन लायक नभएको बताएपछि नेपालले बहराइनसँग होम एण्ड अवे दुवै म्याच उसकै घरेलु मैदानमा खेल्यो ।

होम म्याचको रुपमा रहेको पहिलो खेलमा नेपाल बहराइनसँग ५-० ले पराजित भयो । एक साताभित्रै नेपालले बहराइनसाग अवे म्याच पनि खेल्यो जसमा नेपालले केही सुधारिएको प्रदर्शन गर्‍यो । तर गोल गर्न सकेन र ३-० ले पराजित भयो । बहराइन भ्रमणमा नेपालले समग्रमा ८ गोल बेहोर्‍यो र गोल गर्न सकेन ।

त्यसपछि नेपालले युएई विरुद्ध पनि घरेलु मैदानमा तय भएको खेल खेल्न पाएन । यस पटक पनि एएफसीले दशरथ रंगशालामा खेल खेलाउन उपयुक्त नभएको भनेपछि न्युट्रल भेन्युको रुपमा साउदी अरेबियामा गएर खेल्नुपर्‍यो । जसमा नेपाल युएईसँग फेरि ४-० ले नै पराजित भयो ।

यमन विरुद्धको अवे खेल पनि नेपालले साउदीमै खेल्यो । यमनमा युद्धका कारण उसले पनि घरेलु मैदानमा खेल्ने अवसर गुमायो । अन्तिम खेलमा नेपालले सुरुमा गोल खाएर पनि पुनरागमन गर्दै यमन विरुद्ध अग्रता लिएको थियो तर अन्तिम समयमा गोल खाँदा बराबरीमै चित्त बुझाउनु बाध्य भयो ।

घरेलु मैदानमा खेल्न नपाउँदा घाटा

होम एण्ड अवेका आधारमा खेलाइने छनोटमा नेपालले ३ खेल आफ्नै मैदानमा खेल्न पाउँथ्यो । घरेलु मैदानमा समर्थकहरुको ठूलो भिडका बीच खेल्दा नेपालको प्रदर्शन सुधार हुन सक्थ्यो । घरेलु मैदानमा खेल्दा विपक्षीलाई डोमिनेट गर्न पाउने, आर्थिक रुपमा लाभ लिन पाउने अवसर नेपालले गुमाउँदा दर्शकले पनि आफ्नो टोलीको खेल हेर्न पाएनन् ।

‘घरेलु मैदानमा खेल्न नपाउनु दुर्भाग्य भयो । अवे मैदानमा खेल्नुपर्दा विपक्षीलाई स्वत: फाइदा हुन्छ । त्यसका बावजुद पनि नेपालले केही राम्रो गर्ने प्रयास गरेको थियो’, प्रशिक्षक थापाले भने ।

यसअघि २०२२ को विश्वकप छनोटमा पनि नेपालले अष्ट्रेलिया जस्तो बलियो टिमसँग घरेलु मैदानमा खेल्ने अवसर गुमाएको थियो ।

एसियन कप छनोट तेस्रो चरण २०२५ मार्चमा

विश्वकप छनोट यात्राबाट नेपाल बाहिरिसकेको छ । अब नेपालले एसियन कप २०२७ को लागि तेस्रो चरणको छनोट खेल्नेछ । जुन अर्को वर्ष अर्थात सन् २०२५ को मार्चमा हुनेछ ।

दोस्रो चरणको छनोटबाट बाहिरिएका १८ टोली, विश्वकप छनोटको प्रारम्भिक चरणमा पराजित भएकामध्ये तीन उत्कृष्ट टोली तथा प्लेअफ क्वालिफायरबाट आउने तीन गरी कूल २४ टोली एसियन कप छनोटको तेस्रो चरणमा खेल्नेछन् ।

दोस्रो चरणको छनोटबाट ९ समूहको शीर्ष दुईमा रहेका १८ टोली सिधै एसियन कप २०२७ का लागि छनोट भइसकेका छन् । त्यसैले अब बाँकी रहेको ६ स्थानका लागि २४ टोली भिड्नेछन् ।

२४ टोलीलाई ६ समूहमा विभाजन गरिनेछ । यसमा पनि होम एण्ड अवेका आधारमा खेलहरु खेलाइनेछ । हरेक टिमले घरेलु मैदानमा ३ र बाहिर ३ गरी ६ खेल खेल्नेछन् । त्यसपछि प्रत्येक समूहको शीर्ष स्थानमा रहने टोली एसियन कप २०२७ का लागि छनोट हुनेछन् । तेस्रो चरण छनोट २०२५ मार्च देखि २०२६ मार्चसम्म चल्नेछ ।

अहिलेसम्म नेपाल एसियन कपमा छनोट हुन सकेको छैन । पहिलो पटक एसियन कपमा छनोट हुने हो भने नेपालले ठूलो चुनौती पार गर्नुपर्नेछ । किनभने तेस्रो चरणको छनोटमा रहेका सिरिया, ताजिकिस्तान, थाइल्याण्ड, भियतनाम, लेबनान र भारत बलिया टोली हुन् । सिरिया सबैभन्दा माथिल्लो वरियता अर्थात ८९ औं स्थानमा छ ।

त्यस्तै मलेसिया, फिलिपिन्स, सिंगापुर, तुर्कमिनेस्तान, अफगानिस्तान, यमन, हङकङ, म्यानमार पनि नेपालसँगै तेस्रो चरणको छनोट खेल्नेछन् । नेपालकै स्तरमा रहेका माल्दिभ्स, बंगलादेश चाइनिज ताइपेई, भुटान पाकिस्तान, लाओसजस्ता टिमहरु पनि तेस्रो चरणको छनोटमा हुनेछन् । तेस्रो चरणको छनोटको खेलतालिका आगामी डिसेम्बरमा हुनेछ ।

प्रशिक्षक अनन्त थापा आगामी दिन नेपाली फुटबलका लागि अझ चुनौतीपूर्ण हुने बताउँछन् । ‘नेपाली राष्ट्रिय टिमलाई चुनौती छ । किनभने खेलाडी विदेश पलायन हुँदा राष्ट्रिय टिममा स्थायित्व भएन । यसले पनि चुनौती थपेको छ,’ थापाले भने, ‘एउटा सेट टिम ७-८ वर्ष सँगै खेल्न पायो भने राम्रो टिम बन्छ ।’

प्रशिक्षक थापाले अब एसियन कप छनोटको तेस्रो चरणका लागि अहिले देखि नै योजना बनाएर लाग्नुपर्ने बताए । ‘एन्फाले अहिलेदेखि नै योजना बनाएर तयारी गर्नुपर्छ । पहिलो कुरा लिगको स्थायी संरचना हुनुपर्छ र नियमित लिग हुनुपर्छ’, उनले भने ।

– यस समाचारको श्रोत : Online Khabar हो ।