कोपा–अमेरिका सेमिफाइनल : अर्जेन्टिनालाई क्यानडाको चुनौती

२५ असार, काठमाडौं । अमेरिकामा भइरहेको कोपा अमेरिका २०२४ को पहिलो सेमिफाइनलमा साविक विजेता अर्जेन्टिनाले क्यानडासँग प्रतिस्पर्धा गर्ने भएको छ ।

यो खेल नेपाली समयअनुसार बुधबार बिहान ६ः४५ बजे न्यूजर्सीस्थित मेटलाइफ स्टेडियममा हुनेछ । यस खेललाई डेविड र गोलिएथको ब्याटलसँग पनि जोडिएको छ ।

साविक विजेता र २०२२ को विश्वकप विजेता अर्जेन्टिना फिफा वरीयतामा नम्बर १ टोली हो । क्यानडा ४८औं वरियतामा छ ।

क्यानडाका प्रशिक्षक जेसी मार्सले अर्जेन्टिनालाई बलियो टोली मानेका छन् । तर यसअघि खेलिसकेको भएकाले जानकार पनि रहेको उनले बताए । ‘उनीहरूले पछिल्लो पाँच वर्षमा जम्मा दुई खेल मात्र हारेको छ,’ मार्सले अर्जेन्टिना बारे भने ।

‘लिओनल मेसी अहिलेसम्म यो खेल खेल्ने बेस्ट प्लेअर हुन् । तर हामीलाई आशा छ कि हामीसँग अवसर छ र त्यसैका लागि तयारी गरिरहेका छौँ ।’

कोपा अमेरिका २०२४ को पहिलो खेलमै अर्जेन्टिनाले क्यानडालाई पराजित गरेको थियो । उक्त खेलमा मेसीले दुवै गोलका लागि असिस्ट गरे । जुलियन अल्भारेज र लाउटारो मार्टिनेजले अर्जेन्टिनाका लागि गोल गरेका थिए ।

लाउटारोले जारी प्रतियोगितामा चार गोल गरिसकेका छन् र गोलकिपर एमिलियानो मार्टिनेज लयमा छन् ।

अर्जेन्टिना र क्यानडा दुवैले क्वाटरफाइनलमा पेनाल्टी सुट आउटमा पुगेर खेले जितेका थिए । अर्जेन्टिनाले इक्वेडर तथा क्यानडाले भेनेजुएलालाई पेनाल्टी सुट आउटमा पराजित गरेका थिए ।

‘हामीलाई थाहा छ अर्जेन्टिना कति राम्रो छ भने किनकि हामीले उनीहरूसँग यसअघि खेलिसक्यौं । तर केही क्षणमा हामीले सफलता पनि पाएका थियौं,’ मार्सले भने ।
भेनेजुएलासँगको खेलपछि प्रशिक्षक मार्सले क्यानडाले परफेक्ट म्याच खेलेको बताएका थिए ।

क्यानडाले पहिलो खेलमा अर्जेन्टिनासँग खेले पनि मेसीको टिम सेमिफाइनलमा गियर बढाउने लक्ष्यमा छ । इक्वेडरविरुद्ध क्वाटरफाइनलमा मेसीले पूरा समय खेलेका थिए । समूह चरणमा ह्याम्स्ट्रिङमा चोट लागेपछि उनले चिलीविरुद्ध खेलेनन् ।

अर्जेन्टिनाका प्रशिक्षक लियोनल स्कालोनीले मेसी फिट रहेको बताइसकेका छन् । ‘उनी ठिक छन् र सेमिफाइनल खेल खेल्नेछन्,’ स्कालोनीले भनेका छन् ।

स्कालोनीले मेसी राम्रो अवस्थामा रहेमा खेलाउने नखेलाउने निर्णय आफूमा हुने बताएका छन् । मेसीले शतप्रतिशत फिट नहुँदा समेत राम्रो प्रदर्शन दिएको उनले बताए ।

अर्जेन्टिना र क्यानडा बीचको विजेताले जुलाई १४ मा हुने फाइनलमा उरुग्वे वा कोलम्बियामध्ये एकसँग उपाधिका लागि खेल्नेछ ।

– यस समाचारको श्रोत : Online Khabar हो ।