ब्याडमिन्टनको ओलम्पिक सोलिडारिटी कोचिङ कोर्स हुने

६ कात्तिक, काठमाडौं। नेपाल ब्याडमिन्टन संघको आयोजनामा ब्याडमिन्टनको ओलम्पिक सोलिडारिटी कोचिङ कोर्स हुने भएको छ ।

संघले मंगलबार पत्रकार सम्मेलन गर्दै अक्टोबर २५ देखि नोभेम्बर ९ सम्म बिडब्लुएफ लेभल वान र लेभल टु कोचिङ कोर्स हुन लागेको जानकारी गराएको हो ।

डल्लु आवास क्षेत्रमा रहेको एनओसी अर्थक्वेक मेमोरियल कभर्डहलमा हुने कोचिङ कोर्स अन्तर्गत लेभल टु मा १४ र लेभल वानमा २० कोच सहभागि हुने ब्याडमिन्टन संघले जनाएको छ ।

लेभल टु कोचिङ कोर्स अक्टोबर २५ देखि नोभेम्बर १ सम्म (कात्तिक ९-१४) हुनेछ भने त्यसपछि लेभल वान कोर्स नोभेम्बर ९ देखि ९ सम्म (कात्तिक १९-२४) सञ्चालन हुनेछ ।

चेक रिपब्लिकी मार्केटा, बंगलादेशकी निखिल चान्द्रधार र भुटानका दोर्जीले कोचिङ कोर्स सञ्चालन गर्नेछन् । दुवै लेभलमा ३० प्रतिशत महिला प्रशिक्षक अनिवार्य सहभागि हुनेपर्ने संघका अध्यक्ष राजमी बहादुर श्रेष्ठले बताए ।

नेपालमा पहिलो पटक ब्याडमिन्टनको लेभल टु कोचिङ कोर्स आयोजना हुन लागेको छ । ‘यसअघि लेभल टु कवर्स मलेसियामा गर्न जानुपर्थ्यो । हामीले पहिलो पटक लेभ टु कोचिङ कोर्स पनि नेपालमै गर्न लागेका छौँ । यस कोर्सले नेपाली ब्याडमिन्टन प्रशिक्षकको वृद्धि र विकासमा सहयोग पुग्ने अपेक्षा छ ।’ संघका अध्यक्ष श्रेष्ठले भने ।

अन्तर्राष्ट्रिय ओलम्पिक कमिटीले सुरु गरेको ओलम्पिक सोलिडारिटी कवर्सले विकाससिल राष्ट्रका खेलाडी र खेलको विकासका लागि सहयोग गर्ने गर्छ ।

अन्तर्राष्ट्रिय ओलम्पिक कमिटीमार्फत नेपाल ओलम्पिक कमिटीका लागि ओलम्पिक सोलिडारिटी कोर्स गर्न फण्ड आउने गर्छ । त्यसै अन्तर्गत ब्याडिमन्टनको ओलम्पिक सोलिडारिटी कोर्स हुन लागेको हो ।

यसकोर्स सञ्चालन गर्न ओलम्पिक कमिटीले ब्याडमिन्टन संघलाई ८ हजार डलर प्रदान गर्ने ओलम्पिक कमिटीका उपाध्यक्ष तथा निर्देशक चतुरानन्द राजवैद्यले जानकारी दिए ।

– यस समाचारको श्रोत : Online Khabar हो ।