भजन शिरोमणिको बायोपिक फिल्म ‘आचार्य’ युट्युबमा

काठमाडौं । भजन शिरोमणि भक्तराज आचार्यको जीवनकथामा आधारित फिल्म ‘आचार्य’ युट्युबमा सार्वजनिक भएको छ । बुधबार राति सार्वजनिक भएको फिल्मले राम्रै भ्युज पाइरहेको छ ।

फिल्ममा आचार्यका जेठा छोरा तथा प्रसिद्ध गायक सत्यराज आचार्य शीर्ष भूमिकामा छन् । उनले भक्तराज आचार्यको भूमिका निर्वाह गरेका छन् । सिक्किमेली निर्देशक प्रशान्त रसाइली निर्देशित फिल्म आचार्य दिवंगत भएको केही महिनामा देशव्यापी पुनः प्रदर्शनमा आएको थियो ।

१३ वर्षअघि पहिलोपटक फिल्मलाई हलमा रिलिज गरिएको थियो । गत असार ७ गते पुनः प्रदर्शनको उद्देश्य आचार्यप्रति श्रद्धासुमन व्यक्त गर्नु थियो । पुनः सम्पादन गरिएको हलमा ल्याइएको फिल्मलाई नै दर्शकले युट्युबमा हेर्न पाउनेछन् ।

फिल्ममा आचार्यको सांगीतिक संघर्षको कथा चित्रण गरिएको छ । फिल्ममा सुनिल पोखरेल, अरुणा कार्की, दयाहाङ राई, विपिन कार्की, सौगात मल्ल लगायत कलाकारले अभिनय गरेका छन् । गायक आचार्यको ८२ वर्षको उमेरमा गत फागुन १४ गते निधन भएको थियो ।

– यस समाचारको श्रोत : Online Khabar हो ।