प्रदीप र दिव्याले ४५ दिनमा सके ‘एक्टर’को छायांकन
काठमाडौं । प्रदीप खड्का र दिव्या रायमाझीको शीर्ष भूमिका रहेको फिल्म ‘एक्टर’को छायांकन बुधबार सकिएको छ । वैशाख अन्त्यमा पोखराबाट सुरु भएको छायांकन ४५ औं दिनमा टुंगिएको हो ।
पोखरामा १० र काठमाडौंमा ३५ दिन छायांकन गरिएको छ । निर्माता थमन भण्डारीले एउटा गीत खिच्न बाँकी रहेको बताए । अभिनेता दिलीप रायमाझीकी छोरी दिव्याको डेब्यु र अभिनेता राजबल्लभ कोइरालाको कमब्याक फिल्म भएकाले पनि यो प्रोजेक्ट चर्चामा थियो ।
‘सुटिङ अवधिभर कलाकार र प्राविधिकको साथ राम्रो पायौं । फिल्मलाई लिएर उत्साहित छौं,’ निर्माता भण्डारीले अनलाइनखबरसँग भने, ‘तीन महिनामा दर्शकले टिजर, ट्रेलर र पोस्टरबाट यसबारे थाहा पाउनुहुनेछ ।’ बाँकी रहेको गीतको सुटिङ युरोपमा गर्ने तयारी छ ।
फिल्ममा अभिनेता खड्कालाई हेर्दै आएको भन्दा पृथक लुक्समा देखिने जनाइएको छ । राजन भुसालको डेब्यु निर्देशित फिल्ममा आना शर्मा, सुशील सिटौला, दिव्यदेव पन्त, उषा रजक, प्रदीप चौधरी, बादल भट्ट, अनोज पाण्डे, सुप्रज्ञा शर्मा र सिर्जना अधिकारीको अभिनय छ ।
अदृत फिल्म्सको प्रस्तुतिमा मोती फिल्म्सको निर्माण रहेको फिल्ममा एनिष भुसाल सहनिर्माताको रुपमा छन् । क्रियटिभ प्रोड्युसर मोती कार्की हुन् । छायाकार नरेन्द्र मैनाली हुन् ।
यो फिल्म कात्तिक १५ गते लक्ष्मीपूजामा रिलिज हुनेछ । फिल्मको जापान प्रदर्शन अधिकार समेत बिक्री भएको छ । जापान प्रदर्शन अधिकार खेमराज शाहको म्याक्स इन्टरटेनमेन्टले खरिद गरेको छ ।
– यस समाचारको श्रोत : Online Khabar हो ।