गोलभेडा सस्तियो, यस्तो छ कालीमाटीमा तरकारीको भाउ

१७ असार, काठमाडौं । गोलभेडाको भाउ सस्तिएको छ । यसको आपूर्ति सहज भएसँगै एक सातामा गोलभेडाको भाउ ३१ प्रतिशतसम्म घटेको छ ।

कालीमाटी फलफूल तथा तरकारी बजार विकास समितिका अनुसार सोमबारका ठूलो गोलभेडाको भाउ प्रतिकिलो अधिकतम ७० रुपैयाँ छ । त्यस्तै सानो लोकल गोलभेडाको भाउ प्रतिकिलो १६ रुपैयाँमा झरेको छ भने टनेल गोलभेडाको भाउ किलोको २६ रुपैयाँ छ ।

कालीमाटी बजारमा सोमबार रातो आलुको भाउ प्रतिकिलो अधिकतम मूल्य ६२ रुपैयाँ छ । त्यस्तै सुकेको प्याजको भाउ प्रतिकिलो अधिकतम ९५ रुपैयाँ छ । स्थानीय काउली प्रतिकिलो ७० रुपैयाँ, बन्दा ३०, तने बोडी ६०, घिउ सिमी ८०, राजमा १२०, तितेकरेला ४०, लौका ६०, परवर ३५ तथा घिरौंला ७० रुपैयाँमा कारोबार भएको समितिले जनाएको छ ।

समितिका अनुसार डल्ले च्याउ २४० रुपैयाँ, कन्य च्याउ १२० रुपैयाँ, कुरिलो २५० रुपैयाँ, न्यूरो ८० रुपैयाँ प्रतिकिलोमा कारोबार भएको छ । विगत एक सातामा डल्ले च्याउको मूल्य ३६ प्रतिशत बढेको छ भने कुरिलोको भाउ स्थिर छ ।

एक सातामा आलुको भाउ ११ प्रतिशतसम्म घटेको छ । तीबाहेक बोडी, घिउ सिमी, घिरौंला पनि केही सस्तिएको छ । प्याज, बन्दा, तिते करेला तथा लौकाको भाउ बढेको छ।

– यस समाचारको श्रोत : Online Khabar हो ।