मजदुरको कथा ब्यथामा पुर्णेन्दुले घोषणा गरे फिल्म ‘लेबर’
काठमाडौं । निर्देशक पुर्णेन्दु झाले तेस्रो कथानक फिचर फिल्मको रुपमा ‘लेबर’को घोषणा गरेका छन् । विश्व मजदुर दिवसको अवसरमा बुधबार आयोजित पत्रकार सम्मेलनमा उनले नयाँ फिल्म ल्याउने घोषणा गरे ।
विदेशिएका मजदुरको कथा र ब्यथा चित्रण गर्ने यो फिल्म नेपाली, मैथिली र भोजपुरी भाषामा रिलिज हुने भएको छ । फिल्मको घोषणा गर्दै निर्माताले एक्सन-प्रधान टिजर पनि सार्वजनिक गरेका छन् ।
टिजरमा शोषित र पीडित मजदुरले गरेको विद्रोहको शंखनादको दृश्य चित्रण गरिएको छ । शीर्ष भूमिकामा उत्पल झा छन् । उनलाई टिजरमा कुटाइ खाएको र त्यसपछि अन्य मजदूरलाई संगठित गर्दै विद्रोहको घोषणा गरेको देखाइएको छ ।
यसअघि ‘चौकादाउ’ र ‘संरक्षण’जस्ता चर्चित फिचर फिल्म निर्देशन गरेका पुर्णेन्दुले यसपटक मजदुरको कथा दर्शकमाझ ल्याउन लागेका छन् । चाँडै छायांकन हुने यो फिल्मलाई आगामी डिसेम्बरमा प्रदर्शनमा ल्याउने तयारी छ ।
पत्रकार सम्मेलनमा बोल्दै कतारका लागि पूर्वनेपाली राजदूत सूर्यनाथ मिश्रले यो फिल्म सान्दर्भिक र संवेदनशिल रहेको बताए । प्रवासमा रहेका ४० लाख नेपाली मजदूर र २ करोड नेपालीको सरोकारको विषयमा फिल्म आउन लाग्नु महत्वपूर्ण रहेको उनले बताए ।
कतारका लागि पूर्वनेपाली राजदूत डा. सूर्यनाथ मिश्र ।
चलचित्र संघका अध्यक्ष नरेन्द्र महर्जनले फिल्ममा स्टारभन्दा स्क्रिप्ट महत्वपूर्ण रहेको बताए । संचारकर्मी धर्मेन्द्र झाले यो फिल्म मैथिली फिल्मको आधुनिकतातर्फको प्रस्थानविन्दू रहेको बताए ।
अभियन्ता मानुषी ठाकुरले मजदुरको यथार्थलाई फिल्मले यथार्थपरकरुपमा चित्रण गर्नुपर्ने बताइन् । यो फिल्मको छायांकन गतसातादेखि सुरु भैसकेको छ । अरिपन फिल्म्स र पुर्णेन्दु प्रोडक्सनको यो फिल्म मैथिली भाषामा विश्वब्यापी रिलिज हुने जनाइएको छ ।
यो फिल्मको लेखन तथा निर्देशक पुर्णेन्दुकै हुनेछ । ‘मजदुररसँग पंगा नलेऊ सरकार’ यो फिल्मको बटमलाइन रहेको जनाइएको छ ।
– यस समाचारको श्रोत : Online Khabar हो ।