मण्डनदेउपुरको नवनिर्मित भवन राष्ट्रपतिले गरे उद्घाटन
२७ फागुन, काठमाडौं । राष्ट्रपति रामचन्द्र पौडेलले नागरिकको चाहना अनुसार सेवा प्रवाह हुन सकेमा संविधानले परिकल्पना गरेका लक्ष्य पूरा हुने बताएका छन् ।
आइतबार काभ्रेको मण्डनदेउपुर नगरपालिकाको ७ औं स्थापना दिवस तथा नवनिर्मित प्रशासकीय भवनको उद्घाटन गर्दै उनले संविधानको भावना तथा संघीयताको मर्म अनुरुप राज्यबाट सेवा प्रवाह हुनुपर्ने बताए ।
राष्ट्रपति पौडेलले विकास, पूर्वाधार, कृषि, शिक्षा, सडक, खानेपानी, बिजुलीसहित जनताका आधारभूत आवश्यकता पूरा गर्नुपर्ने पनि धारणा राखे ।
‘कृषि, पर्यटन र उर्जा नै हाम्रो मुलुकको विकासको आधार हो, त्यसको लागि श्रमको सम्मान गर्ने संस्कृतिको विकास आवश्यक छ’, उनले भने, ‘स्थानीयस्तरमा गुणस्तरीय, प्रविधिमा आधारित प्रतिस्पर्धी र प्राविधिक शिक्षा दिएर उत्पादन र रोजगारी बढाउने काम गर्न सकिएमात्र राजनीतिक परिवर्तनपछि मुलुकले अपेक्षा गरेको आर्थिक क्रान्तिको सपना साकार हुन्छ .
मण्डनदेउपुर नगरपालिकाको नवनिर्मित प्रशासनिक भवनमा ६२ वटा साना ठूला कोठा, दुई वटा हल, प्रत्येक फ्लोरमा अपाङ्गता मैत्री शौचालय, महिला र पुरुषका लागि छुट्टै शौचलय निर्माण तथा लिफ्ट जडान गरिएको उपप्रमुख विष्णुमणि नेपालले जानकारी दिए ।
१६ करोड १९ लाख ७९ हजार रुपैयाँको लागतमा तयार भएको भवनको लागि संघीय समपूरकबाट १ करोड ८० लाख रुपैयाँ, जिल्ला समन्वय समिति काभ्रेपाञ्चोकबाट २ करोड रुपैयाँ, संघीय अनुदान (डोलिडार) बाट २ करोड ४० लाख रुपैयाँ तथा बाँकी रकम नगरपालिकाको स्रोतबाट बनेको हो ।
– यस समाचारको श्रोत : Online Khabar हो ।