मधेशमा सरकार सुस्त भएको सत्ता गठबन्धनको निश्कर्ष
२९ कात्तिक, जनकपुरधाम । मधेशमा सत्ता गठबन्धनले जनमत पार्टी नेतृत्वको सरकारको काम सन्तोषजनक नभएको निश्कर्ष निकालेको छ ।
बिहीबार बसेको सत्ता गठबन्धनको बैठकमा सतीशकुमार सिंह नेतृत्वको सरकारले बजेट खर्च गर्न नसकेको, काम सन्तोषजनक नभएको विषय उठेको लोसपा संसदीय दलका उपनेता उपेन्द्र महतोले बताए ।
उनका अनुसार यो विषयमा मुख्यमन्त्री, मन्त्री र गठबन्धन दलका नेताहरु बसेर बजेट खर्च हुन नसक्नुको कारण र प्रभावकारी ढंगले अगाडि बढ्ने भन्ने विषयमा छलफल गर्नेछ ।
जनमत पार्टीका संसदीय दलका नेता महेश प्रसाद यादवले सरकार सुस्त भएको, बजेट खर्च गर्न नसकेको, काम प्रभावकारी नभएर जनतामा निराशै निराशा, गुनासै गुनासा रहेको विषय उठेको बताए ।
‘काम गर्न नसकेकाले जनतामा सरकारप्रति निकै निराश, गुनासो, विगतको सरकार भन्दा पनि खतम छन् भन्ने टिप्पणी र नेतृत्वकर्ता दलको हैसियतले बदनामी हुन थालेपछि जनमत संसदीय दलको आह्वानमै गठबन्धनको बैठक बसेको थियो’, उनले भने ।
उनका अनुसार प्रदेश बजेट सूचना प्रणाली (पीएलएमबीआईएस) नखोलिएकोले बजेट खर्चमा चुनौती देखिएकोले तुरुन्त खोल्ने र सरकारको विषयमा समीक्षा भएको छ ।
त्यस्तै गठबन्धन दलको नियमित बैठक बस्नुपर्ने, कामलाई प्रभावकारी ढंगले अगाडि बढाउनुपपर्ने लगायत विषयमा छलफल भएको उनले बताए ।
उनका अनुसार यो बैठक जनमतका केन्द्रीय अध्यक्ष डा. सीके राउतकै सल्लाहमा बसेको थियो ।
बैठकमा नेपाली काँग्रेस संसदीय दलका नेत कृष्णप्रसाद यादव, एमाले संसदीय दलका नेता समेत रहेका सरकारका भौतिक पूर्वाधार विकास मन्त्री सरोजकुमार यादव, जनमतका प्रदेश सांसद सञ्जय यादव सहभागी थिए ।
– यस समाचारको श्रोत : Online Khabar हो ।