मधेश युनाइटेडले ल्यायो काजकिस्तानकी स्पाइकर

४ भदौ, काठमाडौं । काजकिस्तानकी भलिबल खेलाडी कालिनोभा यभजेनियाले एभरेष्ट वुमन्स भलिबल लिगमा मधेश युनाइटेडबाट खेल्ने भएकी छन् ।

मधेश युनाइटेडले मंगलबार आफ्नो पहिलो विदेशी खेलाडीको रुपमा स्पाइकर कालिनोभालाई घोषणा गरेको हो ।

‘काजकिस्तानकी अनुभवी खेलाडी कालिनोभा यभजिनियाले पहिलो संस्करणको एभरेष्ट वुमन्स भलिबल लिग मधेश युनाइटेडबाट खेल्नेछिन् । उनलाई मधेश युनाइटेड टिममा अनुबन्ध गर्न पाउँदा हामी एकदमै खुशी छौँ’, क्लबले विज्ञप्तिमा भनेको छ ।

१८० सेन्टिमिटर अग्ली र ३५ वर्षीया कालिनोभाले काजकिस्तानको राष्ट्रिय टिमका साथै त्यहाँको घरेलु लिग खेलेको अनुभव छ ।

कालिनोभाले मधेश युनाइटेडबाट खेल्न उत्साहित रहेको बताएकी छन् । उनले भनेकी छन्, ‘मधेश प्रदेशबाट पहिलो संस्करणको एभरेष्ट वुमन्स भलिबल लिग खेल्न म नेपाल आउँदैछु । हाम्रो टिमलाई समर्थन गर्नुहोला ।’

मधेश युनाइटेडकी अपरेसन हेड संज्ञा श्रेष्ठले कालिनोभालाई मधेश टिममा स्वागत गर्दै उनको अनुभवले टिमको लागि धेरै फाइदा पुग्ने बताइन् ।

मधेश युनाइटेडको मार्की प्लेअरमा नेपाली राष्ट्रिय टिमकी स्पाइकर निरुता ठगुन्ना छिन् । खेलाडीहरुमा राष्ट्रिय टिमकी सदस्य संगम महतो र शान्तिकला तामाङ तथा यु-२० टिमकी एलिशा मानन्धर र आशिका क्षेत्री छन् ।

यस्तै हिरा केसी, पूजा थारु र जसना महतो पनि मधेश युनाइटेडको टिममा छन् ।

इन्फिनिटी ड्रिम्सको आयोजनामा हुने भलिबलको पहिलो फ्रेन्चाइज लिगमा टिमले कुल १२ खेलाडीमध्ये ३ जना विदेशी राख्न पाउनेछ । ६ टोली सहभागी हुने लिगको मिति भने घोषणा गरिएको छैन ।

– यस समाचारको श्रोत : Online Khabar हो ।