माइक्रोफाइनान्स सूचक १६ महिनाकै उच्चतम विन्दुमा, यी ३ कारणले बढ्यो

७ जेठ, काठमाडौं । सेयर बजारमा माइक्रोफाइनान्स सेक्टरप्रति उत्साह बढेको छ । यो समूहको सूचक आइतबार करिब १६ महिनायताकै उच्चतम विन्दुमा पुगेको छ । आइतबार बजार बन्द हुँदा माइक्रोफाइनान्स समूहको सूचक ४५९८ अंकमा छ । यो २०७९ माघ २९ यताकै उच्च हो ।

बजारमा ५३ वटा माइक्रोफाइनान्स कम्पनी सूचीकृत छन् । पछिल्ला केही दिनदेखि धेरै मूल्य बढ्नेमा लगातार माइक्रोफाइनान्स कम्पनी पर्दै आएका छन् । आइतबार पनि १० प्रतिशत मूल्य बढ्नेमा ४ माइक्रोफाइनान्स कम्पनी (सबैको, आत्मनिर्भर, सामुदायिक र नेरुडे मिर्मिरे) मात्रै रहे ।

माइक्रोफाइनान्स कम्पनीप्रति उत्साह देखिनुमा मुख्यतः ३ कारण देखिन्छन् । पहिलो, माइक्रोफाइनान्स कम्पनीहरूले सार्वजनिक गरेको तेस्रो त्रैमासिक वित्तीय विवरण तुलनात्मक रुपमा गत आवको सोही अवधिको तुलनामा सुधार देखिएको छ । धेरै माइक्रोफाइनान्स कम्पनीको निष्क्रिय कर्जा र नाफामा आएको सुधारले यस क्षेत्रमा लगानीकर्ताको आकर्षण बढेको देखिन्छ ।

लामो समय माइक्रोफाइनान्स कम्पनीविरुद्ध अराजक क्रियाकलाप हुँदा यस क्षेत्रप्रति लगानीकर्ता निराश थिए । गत मंसिर २० गते यो समूहको सूचक ३२३५ अंकसम्म झरेको थियो । जसले गर्दा धेरै कम्पनीको मूल्य तल थियो । मूल्य तल झरेका बेला ‘एभरेजिङ’का लागि पनि खरिद बढ्यो । माइक्रोफाइनान्स कम्पनीप्रति देखिएका आक्रोशहरु क्रमिक रुपमा घट्दै गए ।

यी कम्पनीहरुको नउठेको साँवा, ब्याज पनि केही हदसम्म उठ्न थाल्यो । धेरै कम्पनीको तेस्रो त्रैमासिक वित्तीय विवरण पनि केही हदसम्म सन्तुलित आएको छ । जसले गर्दा मंसिरयता साढे ५ महिनाको अवधिमै यो माइक्रोफाइनान्स समूहको सूचक ४२ प्रतिशत बढिसकेको छ ।

दोस्रो कारण, माइक्रोफाइनान्स कम्पनीहरुको सेयर संख्या न्यून हुनु हो । तुलनात्मक रुपमा माइक्रोफाइनान्स कम्पनी ‘लो क्याप’ कम्पनी हुन् । जसले गर्दा कारोबारीको पहिलो रोजाइमा माइक्रोफाइनान्स कम्पनीहरु नै पर्ने गरेका छन् । ‘माइक्रोफाइनान्स लो क्याप कम्पनी भएकाले मूल्य पनि तुलनात्मक रुपमा धेरै बढ्ने गरेको पाइन्छ’ सेयर लगानीकर्ता सुवासचन्द्र ढु‌ंगानाले भने ।

ठूला कारोबारीले खरिद बढाउनेवित्तिकै यस समूहका कम्पनीमा आपूर्तिले थेग्न सक्दैन, जसले गर्दा मूल्य उचालिने गरेको छ । अरु क्षेत्रका सूचकहरु माथि सर्दै गरेका बेला यो समूहको सूचकले सबैभन्दा राम्रो प्रदर्शन गरेपछि कारोबारी र लगानीकर्ता दुबैको भीड बढेको उनले बताए ।

त्यस्तै तेस्रो कारणः विगतको उत्कृष्ट लाभांश इतिहास हो । कतिपय माइक्रोफाइनान्स कम्पनीहरुले दिने गरेको लाभांश पनि लोभलाग्दो छ । लाभांशका अलवा पुँजीगत लाभ पनि सँगसँगै मिल्ने भएकाले यस क्षेत्रमा आकर्षण बढेको छ । तीन वर्षअघि ५ हजारमाथि पुगेका माइक्रोफाइनान्सको मूल्य अहिले २ हजारमुनि छन् । विगतको मूल्य इतिहासका कारण पनि यस क्षेत्रप्रति कारोबारीहरु लागेको देखिन्छ ।

– यस समाचारको श्रोत : Online Khabar हो ।