‘मिस्टर एण्ड मिस नेसनल नेपाल’ को ट्यालेन्ट र स्विम-वेयर राउण्ड सम्पन्न

काठमाडौं । ‘मिस्टर एन्ड मिस नेसनल नेपाल २०२४’ को ट्यालेन्ट र स्विम–वेयर राउन्ड सकिएको छ । मंगलबार कुश्मास्थित हार्नेस जिपलाइन एण्ड एडभेन्चर रिसोर्टमा यी दुई सहविधाको प्रतिस्पर्धा गरिएको हो ।

स्विम–वेयर राउन्डमा अन्तिम २९ प्रतियोगीले प्रतिस्पर्धा गरे । सन्तोष उपाध्यायसहित उज्ज्वल जोशी, मानस राई, रोशनी चन्द, समा पराजुली र स्मित तामाङ यस राउन्डको निर्णायक थिए ।

ट्यालेन्ट राउन्डका प्रतियोगीले आ–आफ्नो प्रतिभा देखाए । कविता, नृत्य र गायन कला पस्किएर प्रतियोगीले जजको मन जित्ने प्रयास गरे । कोहीले चित्रकला, नाटक देखाएर जजलाई प्रभावित पार्ने प्रयत्न गरे ।

ट्यालेन्ट राउन्डमा महिलातर्फ ५ र पुरुषतर्फ शीर्ष ३ प्रतियोगीको नाम घोषणा गरियो । महिलातर्फ प्रिया उपाध्याय, श्रृयंका थापा, अदिती श्रेष्ठ, प्रियशा देवकोटा र रजिता पराजुली टप उत्कृष्ट ५ मा परे । पुरुषतर्फ सन्देश सिटौला, विप्लवराज नागनहर र मनिष श्रेष्ठ उत्कृष्ट तीनभित्र छनोट भए ।

यस राउन्डको जजको रूपमा राज शाह, राजु केसी, शिशिर वाग्ले, समा पराजुली, दिक्पाल कार्की र अभिषेक मोहन्टी थिए । सब-टाइटल राउन्डको विजेता भने फिनालेमा घोषणा गरिने आयोजकले जनाएको छ ।

जज समेत रहेका उपाध्ययले काठमाडौंबाहिर कार्यक्रम गर्न पाउँदा खुसी लागेको बताए । कार्यक्रममा कुश्मा नगरपालिकाका मेयर रामचन्द्र जोशीलगायतको उपस्थिति थियो ।

शनिबार टप मोडल राउन्ड र एलिगेन्स राउन्ड ललितपुरको पाटन दरबार म्युजिममा गरिने भएको छ । प्रतियोगिताको फिनाले भने वैशाख १९ गते काठमाडौंस्थित नेपाल प्रज्ञा प्रतिष्ठानमा आयोजना हुने जनाइएको छ ।

विजेतालाई ५ लाख बराबरको गिफ्ट ह्याम्परसहित नेपालको प्रतिनिधित्व गर्न मिस्टर एण्ड मिस सुप्रा नेसनल नेपाल २०२४ लाई पोल्यान्ड, मिस्टर इन्टरनेसनल नेपाल २०२४ लाई थाइल्याण्ड, मिस ग्लोब नेपाल २०२४ लाई अल्बानिया र मिस इन्टर कन्टिनेन्टल नेपाल २०२४ लाई इजिप्ट पठाइने भएको छ ।

– यस समाचारको श्रोत : Online Khabar हो ।