प्रहरी अस्पतालका एसएसपीको आरोप : नेपाल प्रहरी प्राइभेट कम्पनी जस्तो भयो
१२ असार, काठमाडौं । नेपाल प्रहरी अस्पताल, महाराजगञ्जका प्राविधिक प्रहरी वरिष्ठ उपरीक्षक (एसएसपी) दीपक श्रेष्ठले नेपाल प्रहरी निजी कम्पनी जस्तो भएको आरोप लगाएका छन् ।
सामाजिक सञ्जाल फेसबुकमा स्ट्याटस लेख्दै श्रेष्ठले पछिल्लो समय नेपाल प्रहरी ‘प्राइभेट कम्पनी लिमिटेड’मा परिणत भएको उल्लेख गरेका हुन् । ‘… अब प्रहरी महानिरीक्षकले होइन कि सीईओले नेतृत्व गर्ने भएछ’, श्रेष्ठले लेखेका छन् ।
प्रहरी अस्पतालका एसएसपी श्रेष्ठ प्रहरी नायब महानिरीक्षक (डीआईजी) बढुवाका आकांक्षी थिए । तर, जनपथतर्फ दरबन्दी खाली नै नभइ दुई दिनका लागि एआईजी बढुवा सिफारिस गरिरहँदा प्रहरी अस्पतालमा खाली हुँदा पनि बढुवा प्रक्रिया अघि बढाइएको थिएन ।
५० दिनदेखि दरबन्दी रिक्त हुँदा पनि बढुवा नभएपछि डा. श्रेष्ठ र आचार्य बिहीबार राति १२ बजेबाट अवकाशमा जाँदैछन् । श्रेष्ठ नेत्ररोग विशेषज्ञ हुन् भने आचार्य नाक, कान, घाँटी विशेषज्ञ हुन् ।
अस्पताल स्रोतका अनुसार, अस्पतालमा डीआईजी बढुवा प्रक्रिया अघि नबढाउन उपप्रधानमन्त्री एवं गृहमन्त्री रवि लामिछाने र प्रहरी महानिरीक्षक वसन्त कुँवर दुवै एकमत थिए ।
स्रोतका अनुसार, लामिछाने एसएसपी सञ्चिता घिमिरेलाई अघि बढाउन चाहन्थे भने अर्का आकांक्षी दामोदर पौडेललाई अघि बढाउन एमाले नेताहरुको जोडबल थियो ।
श्रेष्ठ र आचार्यपछि वरियतामा पौडेल, घिमिरे र मनोज यादव छन् । बढुवा प्रक्रिया अघि नबढाउँदा असन्तुष्ट एसएसपी श्रेष्ठले अनलाइनखबरसँग कुरा गर्दै आफूहरुप्रति बदनियत राखिएका कारण २३ वर्षमै अवकाशमा जान लागेको बताए ।
दुई दिनअघि मात्र गृह मन्त्रालयले उपप्रधान एवं गृहमन्त्री रवि लामिछानेका कानुन व्यवसायी सुशील पन्तका नातेदार पोषराज पोखरेललाई एआईजीमा बढुवा गर्न सिफारिस गरेको थियो ।
जनपथतर्फ १९ असारबाट एआईजी उमेशराज जोशी अवकाशमा गएपछि एआईजीको दरबन्दी खाली हुँदैछ । तर, त्यसअगावै पन्त र पूर्वएआईजी दिवेश लोहनीको जोडबलमा गृह मन्त्रालयले पोखरेललाई एआईजी बढुवाका लागि सिफारिस गरेको थियो ।
बढुवा भएपनि उनले दुई दिन मात्र एआईजी भएर उमेर हदका कारण २१ असारबाट अवकाश पाउनेछन् । यस्तोमा शक्तिकेन्द्र रिझाउन नसक्दा प्रहरी अस्पतालमा दुई एसएसपीले घर जानुपरेको आरोप प्रहरी अधिकृतहरु नै लगाउँछन् ।
प्रहरीमा एसएसपीबाट एसएसपी बढुवा हुँदा पनि यसअघि एक अधिकृतले सामाजिक सञ्जालमार्फत गम्भीर आरोप लगाएका थिए । बढुवाको सूचीमा नपरेका एसपी गोविन्द अधिकारीले फेसबुकमार्फत प्रश्न गरेका थिए, ‘गृहबाट बढुवा लिस्ट आउट गर्ने, मिडिया ट्रायल गर्ने, अनि बार्गेनिङ गरी फाइनल गर्ने नयाँ चलन चलेको हो ?’
– यस समाचारको श्रोत : Online Khabar हो ।