मेरिल्याण्डमा गुञ्जियो ‘कोशीको पानी यो जिन्दगानी’ (तस्वीर)

मेरिल्याण्ड (अमेरिका) । निर्धारित समयअनुसारै बेलुकी ठीक ८ बजे कार्यक्रम सुरु भएसँगै निलो जिन्स पहिरेका अमृत गुरुङ देखापरे र दर्शकतर्फ झुकेर अभिवादन गरे । ड्रमसेटको आवाजसँगै दुवै हात दर्शकतर्फ झट्कारे । यतिन्जेल हलमा भरिएका दर्शकमाझ व्यापक उत्साह र हलचल सुरु भइसकेको थियो । त्यही उत्साहलाई समात्दै उनले पहिलो गीत सुनाए-

कोशीको पानी यो जिन्दगानी

सललल जाइजाने हौ हजुर

आमाको कोखमा बास मात्र लिएँ नि

कुन देशको मरन हौ हजुर

त्यसपछि ब्यान्डका सार्वकालिक हिट गीत ‘भेडाको ऊन’ र ‘छेक्यो छेक्यो’ गाएपछि अमृतले दर्शकसँग छोटो भलाकुसारीको क्रम सुरु गरे ।

कार्यक्रममा नयाँ-पुराना गीतको लस्कर थियो । ती सबको बीचबीचमा अमृतले दर्शकसँग दोहोरो संवाद पनि जारी राखेका थिए ।

सबै स्थानमा जस्तै यहाँ पनि अमृतले भावी पुस्तालाई सकेसम्म मातृभाषा पनि सिकाउन र त्यो सकिएन भने कम्तीमा नेपाली भाषा सिकाएर भएपनि तिनलाई उनीहरूको जरोसँग जोडिदिन अनुरोध गरेका थिए ।

कन्सर्ट हेर्न आएका थुप्रै दर्शकले साथमा राष्ट्रिय झण्डा पनि बोकेरै ल्याएका थिए भने ढाकाटोपी अनि भादगाउँले टोपी लगाएर उपस्थित भएका पनि जताततै देखिन्थे ।

यसरी आएका दर्शक अनेक किसिमका समूहमा आबद्ध थिए । कोही साथीसँग मिलेर आएका थिए, कोही आफ्ना जोडीका साथमा उपस्थित थिए भने कोही आफ्ना अभिभावक र केटाकेटीसहित सपरिवार आएका पनि उत्तिकै भेटिन्थे ।

त्यस्तै समूहमध्ये एक थियो भर्जिनियामा केटाकेटीलाई नेपाली भाषा, संस्कृति र सम्पदा पढाउन ‘पाठशाला’ सञ्चालन गरिरहेका स्वयंसेवी शिक्षकको जमात । बन्दना, सम्झना, सजना, राज र राजेश लगायतको त्यो समूह सुरुदेखि रमाइरहेको देखिन्थ्यो ।

‘नेपाली बालबालिकालाई आफ्नो भाषा र संस्कृति सिकुन् भन्ने अमृत दाइको चाहनासँग हाम्रो मिसन ठ्याक्कै मिलेको पायौं,’ उनीहरूले भने, ‘हाम्रो उद्देश्य पनि आफ्नो जरालाई जोगाउने र भविष्यलाई उज्ज्वल बनाउने नै हो ।’

नेपथ्यको कन्सर्टबाट पनि उनीहरू उत्तिकै रमाएको प्रतिक्रिया दिइरहेका थिए ।

कन्सर्ट सकिएपछि पनि केहीबेरसम्मै आयोजना स्थलमा रमाएका दर्शकको चहलपहल देखिन्थ्यो । त्यसैमध्ये एक थिए- काठमाडौं छँदा न्युरोडको विशालबजारमा पसल चलाउने कमल पारख ।

‘पूरा जीवनै ढाकिने गरी हामी यो ब्यान्डसँगै हुर्कियौं, यो ब्यान्डसँगै आनन्द लियौं र अहिले पनि यो ब्यान्डसँगै रमाइरहेका छौं,’ कमलले भने ।

कन्सर्टमा नेपथ्यका मुख्य गायक अमृतलाई ड्रमसेटमा ध्रुव लामा, बेस गितारमा सुविन शाक्य, गितारमा नीरज गुरुङ, मादलमा शान्ति रायमाझी र किबोर्डमा दिनेशराज रेग्मीले सघाएका थिए ।

‘आयोजकका रूपमा मेरो जीवनकै यो सबैभन्दा बेस्ट शो भयो,’ आयोजक समूहका अभिजित राईले भने, ‘म आफैं पनि दर्शकमै मिसिएर कन्सर्टभरि नाचिरहेको थिएँ । कतिपय बेला त खुसीले आँसु थाम्न पनि सकिनँ ।’

‘रातो र चन्द्रसूर्जे’ गाइरहँदा शरीरमा जताततै काँडा उम्रेजस्तो महसुस भएको उनको प्रतिक्रिया थियो । ब्याण्डले सेप्टेम्बर ७ मा पेन्सिलभेनियाको ह्यारिसबर्गमा प्रस्तुति दिंदैछ । अबको सातौं कन्सर्टसँगै यस पटकको डेढ महिना लामो अमेरिका यात्राले विश्राम लिने नेपथ्यले जनाएको छ ।

– यस समाचारको श्रोत : Online Khabar हो ।