हिरासतमा रविको भय : अझै थुनामै राख्ने तयारी गरियो

८ कात्तिक, पोखरा । पूर्वउपप्रधान तथा गृहमन्त्रीसमेत रहेका राष्ट्रिय स्वतन्त्र पार्टी (रास्वपा) का सभापति रवि लामिछानेलाई हिरासतमै राखेर अनुसन्धान गर्न कास्की जिल्ला अदालतले पहिलो पटक दिएको म्याद आज सकिँदै छ ।

गत शुक्रबार काठमाडौंमा लामिछानेलाई पक्राउ गरी सोही रात पोखरा ल्याएर आइतबार अदालतमा उपस्थित गराउँदा पक्राउ परेकै दिनदेखि लागु हुने गरी अनुसन्धानका लागि ६ दिनको म्याद दिइएको थियो ।

पोखराको सूर्यदर्शन सहकारीको रकम गोर्खा मिडियामार्फत अपचलन गरेको अभियोगमा उनलाई सहकारी ठगी तथा संगठित अपराधको मुद्दा लगाइएको छ । सोही मुद्दामा पहिलो पटक दिइएको म्याद सकिएपछि प्रहरीले आज फेरि उनलाई अदालतमा उपस्थित गराउँदै छ ।

गत असोज ६ गते नै पक्राउ परेर पोखरा ल्याइएका गोर्खा मिडिया प्रालिका पूर्वसञ्चालक तथा पूर्व डिआइजी छविलाल जोशीलाई पनि आजै अदालतमा उपस्थित गराइँदै छ ।

रुपन्देहीको सुप्रिम सहकारीको रकम पनि गोर्खा मिडियामार्फत अपचलन भएको भन्दै जोशीलाई रुपन्देहीमा बयान गराएर बुधबारमात्र पोखरा ल्याइएको छ । गोर्खा मिडियाकै मुद्दा भएकाले मिलान गरी आज एकसाथ उनीहरुलाई अदालतमा उपस्थित गराउन लागिएको हो ।

राजनीतिक प्रतिशोध साँधेको पुष्टि भयो : वाग्ले

सरकारले राजनीतिक प्रतिशोधको साँधेर रविलाई पक्राउ गरेको आरोप रास्वपाले लगाएको छ । विहीबार बिहान पोखरामा पत्रकार सम्मेलन गरेर रास्वपा उपसभापति स्वर्णिम वाग्लेले १२५ घण्टा हिरासतमा राख्दा ४–५ घण्टामात्र बयान लिइएको भन्दै वाग्लेले भने, ‘मानमर्दन गर्ने, अपमान गर्ने जुन शैलीमा सरकार प्रस्तुत भएको छ यसको एउटै मकसद के हो त तेरो सेखी झार्छु, देखाइदिन्छु भन्ने शैलीमा सरकार प्रस्तुत भएको छ ।’

उनले थपे, ‘यसलाई सभ्य भाषामा राजनीतिक प्रतिशोध नै भनिन्छ । र, त्यो राजनीतिक प्रतिशोध नै साँधेको हो भन्ने राष्ट्रिय स्वतन्त्र पार्टीको दाबीलाई हिजोको पछिल्लो वस्तुस्थितिलाई पुष्टि गरेको छ ।’

पत्रकार सम्मेलनमा रास्वपाका नेताहरु । तस्वीर: सुदर्शन रञ्जित

पूर्व गृहमन्त्री रवि लामिछाने कास्की प्रहरी हिरासतमा पनि निकै छटपटीमा छन् । उनमा यसपटक लामै समय हिरासत बस्नुपर्ने, नभए पुर्पक्षका लागि कारागार नै पठाउने हो कि भन्ने भय पनि देखिएको उनलाई भेटेकाहरु बताउँछन् ।

आफूलाई भेट्न आएका रास्वपाकै नेताहरुसँग पनि रविले आफूलाई हिरासतमै राख्नका लागि फेरि म्याद थप्ने गरी बयान लिइएको बताएका छन् । प्रहरीले बयान लागि बोलाएर २/३ वटामात्रै प्रश्न सोध्ने र ती सबै पहिले नै जवाफ दिइसकेको प्रश्न रहेको रविले आफ्ना नेता तथा कानुनी प्रतिनिधिहरुलाई बताएका छन् ।

रविलाई प्रहरी हिरासत भवनको माथिल्लो तलामा अलग्गै राखिएको छ । प्रहरीले बयान कक्षमा बोलाएर ३ वटामात्रै प्रश्न सोधेर सकियो भनेपछि रविले आपत्ति जनाएको प्रहरी स्रोतको भनाइ छ । ‘रविलाई लागिरहेको छ कि मलाई यसपटक छोड्दैनन्,’ ती अधिकृतले भने, ‘प्रहरी बयानदेखि सरकारी वकिलको कार्यालयसम्मको बयानमा उहाँमा ठूलो संशय र भय देखिन्छ ।’

पोखराको सूर्यदर्शन सहकारीको साढे ५ करोड रकम गोर्खा मिडियामार्फत संगठित रुपमा अपचलन गरेको अभियोग उनीमाथि छ । रविले सूर्यदर्शन सहकारीबाटै १ करोड रुपैयाँ लगेर गोर्खा मिडियामै मिलान गरेको पनि प्रतिवेदनमा छ ।

गितेन्द्रबाबु राई (जीबी) नेतृत्वको गोर्खा मिडियाले त्यही समूहले देशका विभिन्न ठाउँमा खोलेको सहकारीमा ६५ करोड रुपैयाँभन्दा धेरै अपचलन गरेको संसदीय विषय छानबिन समितिको प्रतिवेदनमा छ । समितिले रवि, छवि र गोर्खा मिडियाकै सञ्चालक तथा सूर्यदर्शन सहकारीका कोषाध्यक्ष कुमार रम्तेललाई पनि कारबाहीका लागि सिफारिस गरेको थियो । रम्तेल पुर्पक्षका लागि कास्की कारागारमै छन् ।

सूर्यदर्शनको रकम सिधै रविले खर्च गरेको नदेखिए पनि गोर्खा मिडियामार्फत अपचलन गर्न उनको संलग्नता रहेको भन्दै सरकारी वकिलको कार्यालयले अदालतमा अभियोग लगाएको छ । सहकारी ठगीमात्र नभएर संगठित अपराधमै मुद्धामा थप अनुसनधानका लागि थपिएको म्याद अनुसन्धान नै नगरी सकाएर फेरि म्याद थप्ने तयारी गरिएको रविले जानकारी गराएका छन् ।

रविलाई रुपन्देही पठाउने तयारी

एउटै प्रकृतिको कसुरुमा गत असोज ६ गते पक्राउ परेका छविलाई रुपन्देहीको सुप्रिम सहकारी ठगी प्रकरणमा पनि बयान गराएर बुधबारमात्र पोखरा ल्याइएको छ । रविलाई पनि पोखरामा अनुसन्धानका लागि थप म्याद लिएर बयानका लागि रुपन्देही पठाउने तयारी रहेको प्रहरी स्रोतले बताएको छ ।

रविको मंगलबार सरकारी वकिलको कार्यालयमा बयान भएको थियो भने बुधबार जिल्ला प्रहरी कार्यालयमै बयान लिइएको छ । तर, कुनै पनि प्रश्नको तयारी नगरी बयानका लागि बोलाउने र अलमल्याउने काम भइरहेको रास्वपाका कार्यवाहक प्रवक्ता तथा सहमहामन्त्री कविन्द्र बुर्लाकोटीले बताए ।

‘६ दिन राख्दा ६ घन्टा पनि बयान लिइएको छैन । कागजपत्र, अनुसन्धान गर्ने प्रश्न नै तयारी नगरी बयान लिइएको छ । कुनै पनि डकुमेन्ट तयार नगरी भाग्न लागेको चोर समाते जसरी समातियो र यसलाई जसरी पनि थुन्नैपर्छ भन्ने अभिप्राय देखिएको छ,’ बुर्लाकोटीले भने, ‘कुन अभियोगमा के अनुसनधान गर्न समातिएको हो, सोध्नुपर्ने कुरा नै सोधिएकै छैन ।’

अहिलेसम्म ५/६ घण्टामात्रै बयान लिइएको र बयान लिँदा पनि एउटै कुरा सोधिएको उनको भनाइ थियो । पुरक जाहेरीमाथि पनि कास्की प्रहरी काठमाडौंमै पुगेर बयान लिएको थियो ।

अहिले सोधिएको प्रश्न, त्यो बेला सोधिएका प्रश्न एउटै रहेको बुर्लाकोटीले बताए । रविसँग नेताहरुले भेटेपछि भएको विवरण उल्लेख गर्दै बुर्लाकोटीले भने, ‘पुरक जाहेरीको बयानपछि त्यो प्रहरीले उहाँलाई मुद्दा चलाउनुपर्ने देखिएन भनेको छ । राजनीतिक प्रतिशोधकै आधारमा पहिले नै पक्राउ गरेर थुन्ने र फेरि तिनै प्रश्न सोध्ने काम भइरहेको छ ।’

विरोध प्रदर्शन जारी

रास्वपा उपसभापति डिपी अर्यालले सभापति लामिछानेलाई राजनीतिक प्रतिशोधले पक्राउ गरिएको भन्दै रास्वपाले शान्तिपूर्ण प्रदर्शन गरिरहेको र बिहीबार पनि वाई चोकमा गर्न लागेको जानकारी जानकारी गराउन पनि प्रहरी कार्यालय पुगेको बताए । ‘हामीले शान्तिपूर्ण आन्दोलन गरिरहेका छौं । कसैले घुसपेठ गरेर अशान्ति मच्चाउलान्, त्यसमा ख्याल गरिदिन पनि भनेका छौं,’ डीपीले भने ।

जीवी राईको नेतृत्वमा विभिन्न सहकारीबाट जनताको ८७ अर्ब रुपैयाँ सहकारीमा डुबेको छ । रवि गृहमन्त्री हुँदा पटक पटक आश्वासन दिएर पनि पक्राउ नगरेको भन्दै पीडित आक्रोसित थिए । अब भने रवि नै पक्राउ परेपछि यो मुद्दा किनारा लाग्ने सक्ने आशा पीडितको छ ।

पोखरा महानगरले गराएको सूर्यदर्शनको पहिलो प्रतिवेदनले सहकारी ठगीमा संलग्न अन्य व्यक्तिलाई जोगाएको भन्दै पुरक जाहेरी परेपछि र चौतर्फी दबाबपछि फेरि विस्तृत अनुसन्धान गरी गत वैशाख २६ गते पोखरा महानगरका मेयर धनराज आचार्यलाई प्रतिवेदन बुझाएको थियो । त्यसकै भोलिपल्ट मेयर आचार्यले जिल्ला प्रहरी कार्यालय कास्कीलाई ३ हजार ४ सय १९ पृष्ठको प्रतिवेदन हस्तान्तरण गरेका थिए ।

२०८० भदौ २१ गतेसम्म सस्थाले प्रयोग गरेको कम्प्युटर लेखा प्रणाली सफ्‌टवेयरमा उल्लेख भएका कुल १८ हजार ७०० वटा बचत खातामा १ अर्ब ३५ करोड ५३ लाख ५४ हजार ८९९ रहेको पाइएको प्रतिवेदनले देखाएको छ ।

प्रहरी प्रतिवेदनमा १ अर्ब ३५ करोड रुपैयाँ ठगी भएको उल्लेख गरिए पनि सरकारी वकिलको कार्यालयले जिल्ला अदातलमा दर्ता गरेको मुद्दामा १ अर्ब ११ करोड ३४ लाख ४३ हजार ४५ रुपैयाँ बिगो रकम जाहेरीवालालाई दिलाउन माग गरिएको छ । ८ देखि १० वर्ष कैद सजायको माग गरिएको छ ।

– यस समाचारको श्रोत : Online Khabar हो ।