यति विमान दुर्घटनामा ज्यान गुमाउनेको सम्झनामा दुर्घटनास्थलमा स्मृति स्तम्भ
१ माघ, पोखरा । अघिल्लो वर्ष माघ १ गते पोखरामा भएको विमान दुर्घटनामा ज्यान गुमाउनेको सम्झनामा पोखरा महानगरले स्मृति स्तम्भ बनाएको छ ।
सोमबार पोखरा महानगर प्रमुख धनराज आचार्य र जिल्ला प्रशासन कार्यालय प्रमुख वासुदेव घिमिरेले उक्त स्तम्भको संयुक्त अनावरण गरे ।
दुर्घटनामा ज्यान गुमाउनेको सम्झनामा पोखरा महानगरले १० लाख रुपैयाँ खर्चेर उक्त स्मृति पार्क बनाएको हो । स्तम्भमा मृतक सबैको नाम र ठेगाना कुँदिएको छ ।
गत वर्ष आजकै दिन काठमाडौंबाट पोखराका लागि उडेको यति एअरलाइन्सको विमान पोखरा सेती किनारमा दुर्घटनाग्रस्त बनेको थियो । दुर्घटनामा परी विमानमा सवार सबैको मृत्यु भएको थियो । विमानमा चालक दलका ४ जनासहित ७२ जनाको मृत्यु भएको थियो ।
स्तम्भमा विमान दुर्घटना चालक दलका सदस्यसहित ५७ जना नेपाली र १५ जना विदेशी नागरिकको मृत्यु भएको थियो । त्यस स्थानमा स्मृति स्तम्भसँगै स्मृति पार्क निर्माण गर्ने महानगरपालिकाको योजना रहेको मेयर धनराज आचार्यले जानकारी दिए ।
– यस समाचारको श्रोत : Online Khabar हो ।