याक चौंरी महासंघ अध्यक्षमा पावीहाङ राई
१७ जेठ, काठमाडौं । याक चौंरी महासंघ, नेपालको प्रथम राष्ट्रिय महाधिवेशनले पावीहाङ राई (भोजपुर) को नेतृत्वमा १३ सदस्यीय नयाँ कार्यसमिति चयन गरेको छ । महाधिवेशनको मूल नारा ‘हिमालका गहना, याक चौंरी संरक्षण हाम्रो चाहाना’ रहेको थियो ।
काठमाडौंमा (बुधबार र बिहीबार) दुई दिनसम्म सञ्चालन भएको महाधिवेशनबाट उपाध्यक्षमा लालकुमार केसी (दोलखा), महासचिवमा सोजन हिराचन (मुस्ताङ), सचिवमा विशाल लिम्बु (ताप्लेजुङ) र कोषाध्यक्षमा आङफुर्वा शेर्पा (सोलखुम्बु) निर्वाचित भएका छन् ।
नेपालको संस्कृति, परम्परा, पहिचान याक चौंरी पालनसँग जोडिएकोले याक चौंरीको महत्व बुझाउन तथा याक चौंरीपालनलाई सम्वर्द्न एवम् प्रवर्द्र्धन गर्न संगठित भइरहेको अध्यक्ष पावीहाङ राईको भनाइ छ ।
याक चौंरी लोप भए हिमाली क्षेत्रको सौन्दर्य, त्यहाँका बासिन्दाको पेसा, हिमाली जडीबुटी समेत लोप हुने याक चौंरी पालक कृषकहरूको तर्क छ ।
विगत ३० वर्षअघि २ लाख २ हजारको संख्यामा रहेको याक चौंरी अहिले ५२ हजारमा झरेको उनीहरूले बताएका छन् ।
याक चौंरीपालन लोप हुने जोखिम बढ्दै गएको भन्दै याक चौंरी पालक किसानहरु संगठित रुपमा सम्वर्द्धन तथा प्रवर्द्र्धनमा लागेको बताउँछन् ।
हाल सोलुखुम्बु, ताप्लेजुङ, दोलखा, डोल्पा लगायत २७ जिल्लाका हिमाली क्षेत्रमा याक चौंरी पालन हुने गरेको छ ।
– यस समाचारको श्रोत : Online Khabar हो ।