नेपाली फिल्म खेल्न काठमाडौं आइपुगे नेटफ्ल्क्सि स्टार जेमी बेकन
काठमाडौं । नेपाली फिल्म ‘एक्लो’मा अभिनय गर्न बेलायती अभिनेता जेमी बेकन मंगलबार काठमाडौं आइपुगेका छन् ।
उनलाई त्रिभुवन अन्तर्राष्ट्रिय विमानस्थलमा निर्देशक प्रदीप शाही, अभिनेत्री दीया पुन, कविता नेपाली लगायतले स्वागत गरे । ढाकाटोपी र फूलमालामा न्यानो स्वागत ग्रहण गरेपछि बेकनले नेपाली आतिथ्यताको प्रशंसा गरे ।
‘म पहिल्यैदेखि नेपाल आउन पनि उत्साही थिएँ’ विमानस्थलमा अनलाइनखबरसँग कुरा गर्दै बेकनले भने, ‘नेपाल र बेलायतबीचको यो को-प्रोडक्सन फिल्ममा काम गर्न लाग्दा खुसी छु ।’
बेकन यो फिल्मको लागि बेलायती निर्माण साझेदारको रुपमा समेत छन् । यो फिल्मले नेपाल र बेलायतबीच बलियो सम्बन्ध तुल्याउने र नेपाललाई एसियामा आकर्षक छायांकन गन्तव्यस्थलको रुपमा विकास गर्ने आशा बेकनले व्यक्त गरे ।
बेकन नेटफ्ल्क्सि श्रृंखला ‘व्हाइट लाइन्स’मा शीर्ष भूमिका र स्टीवन कुकसनको फिचर फिल्म ‘ब्राइटन’मा सहायक भूमिकाका लागि परिचित छन् । उनी ‘द होर्डर’ र बीबीसी ड्रामा ‘फादर ब्राउन’मा पनि देखा परेका छन् । साथै उनी, नेटवर्कको शो ‘मिस्टर लभरम्यान’मा देखा परे जुन गत जेठ महिनामा ट्राइबेकमा डेब्यु भएको थियो ।
साइन्स-फिक्सन फिल्म ‘एक्लो’लाई शाहीले निर्देशन गर्नेछन् । यो फिल्ममा बेकनले बेलायती अन्तरिक्षयात्रीको भूमिका निर्वाह गर्नेछन् ।
यो फिल्मले खतरनाक भाइरसले सन् २०३० सम्म मानिसले पृथ्वी ग्रह छाड्ने भविष्यको एक काल्पनिक कथा भन्छ । त्यसको ६० वर्षपछि बेलायती अन्तरीक्षयात्री ज्याक (बेकन) आफ्ना साझेदारसँग हिमालय क्षेत्रमा क्रास-ल्यान्डिङ गर्छन् ।
तिनीहरूले आफ्नो वरपरको खोजी गर्छन् र पहाड बीचमा रहेको गुफाभित्र लुकेको शहर पत्ता लगाउँछन्, जहाँ तिनीहरूले एक रहस्यमय व्यक्तित्व (प्रदीप खड्का)लाई भेट्छन्, जो हिमालय क्षेत्रको पौराणिक संरक्षक हो । फिल्ममा बेकनसँगै प्रदीप खड्काको समेत अभिनय छ ।
अभिनेता बेकन ३० दिन नेपालमा रहनेछन् । काठमाडौं र उपल्लो मुस्ताङमा हुने छायांकनमा उनी सहभागि हुनेछन् । ४५ दिनको छायांकन तालिका विहिबारदेखि सुरु हुनेछ । बुधबार बिहान भद्रकालीमा हुने शुभसाइत पूजामा अभिनेता बेकन पनि सहभागि हुनेछन् ।
– यस समाचारको श्रोत : Online Khabar हो ।