कोशीका कप्तान अंकित अर्धशतक बनाएपछि आउट
५ माघ, काठमाडौं । कोशी प्रदेशका कप्तान अंकित सुवेदी प्रधानमन्त्री कप एकदिवसीय राष्ट्रिय प्रतियोगितामा वागमती प्रदेशविरुद्ध अर्धशतक प्रहार गर्दै आउट भएका छन् ।
जितका लागि २७४ रनको लक्ष्य पछ्याएको कोशीले २४.३ ओभरमा ३ विकेट गुमाउँदै ११४ रन बनाएको स्थितिमा अंकित आउट भएका हुन् । उनी ६५ बलमा ४ चौका र २ छक्कासहित ५३ रनमा क्याच आउट भए ।
तेस्रो विकेटका लागि सुजन थपलिया र अंकितले ६९ रनको साझेदारी गरेका छन् ।
२०२२ को प्रधानमन्त्री कपमा बागमतीलाई ६९ रनले हराउन अंकितले ११० रनको शतकीय इनिङ खेलेका थिए ।
ओपनर सोनु अन्सारी ४२ बलमा ४ चौकासहित २१ रनमा आउट भए । उनी प्रतीक श्रेष्ठको बलमा एज लागेर २१ रनमा रविन जोशीबाट क्याच आउट भए ।
मिनाष थापालाई वैकल्पिक फिल्डर विवेक रानामगरले शून्यमा रन आउट गरेका थिए ।
त्यसअघि त्रिवि क्रिकेट मैदानमा टस हारेर पहिला ब्याटिङको निम्तो पाएको वागमती ४८.३ ओभरमा २७३ रनमा अल आउट भएको थियो । बागमतीका ओपनर आशुतोष घिरैयाले १११ बलमा १६ चौका र २ छक्कासहित ११८ रनको सानदार शतकीय इनिङ खेलेका थिए ।
– यस समाचारको श्रोत : Online Khabar हो ।