यू-१९ राष्ट्रिय क्रिकेट : विपिनको ७ विकेटका बाबजुद कोशी पराजित
१० कात्तिक, काठमाडौं । नरेश श्रेष्ठ मेमोरियल यू-१९ पुरुष राष्ट्रिय क्रिकेटमा मधेश प्रदेशले विजयी सुरुवात गरेको छ ।
कोशी प्रदेशका विपिन महतो एक्लैले ७ विकेट लिएपनि ब्याटिङ राम्रो गर्न नसक्दा कोशी पराजित भयो ।
विराटनगरको गिरिजाप्रसाद कोइराला क्रिकेट स्टेडियममा शनिबार भएको उद्घाटन खेलमा मधेशले कोशी प्रदेशलाई २२ रनले पराजित गरेको हो ।
मधेशले दिएको १८६ रनको लक्ष्य पछ्याएको कोशीले ४३ ओभरमा सबै विकेट गुमाएर १६३ रन मात्र बनाउन सक्यो ।
कोशीका लागि विकेटकिपर सोनु अन्सारीले सर्वाधिक ३९ रन बनाए । आशिष मगरले ३१ रन जोडे । मधेशका लागि रन्जित कुमार र अफ्रुदिन रेइनले ३-३ विकेट लिए ।
टस जितेर पहिले ब्याटिङ गरेको मधेशले ४६.२ ओभरमा सबै विकेट गुमाएर १८५ रन बनाएको थियो । मधेशका लागि नेपाल ए टिमबाट खेलिसकेका मयन यादवले अर्धशतक बनाए । उनले ६६ बल खेल्दै ४ चौका र ३ छक्का मद्दतमा ५२ रन बनाए । विकेटकिपर साहिल पटेलले ४६ बलमा २ चौका र ३ छक्का प्रहार गर्दै ४८ रन जोडे ।
कोशीका लागि विपिन महतोले ९.२ ओभरमा १ मेडन राख्दै ४२ रन खर्चेर ७ विकेट लिए । प्रेम कामतले २ तथा सौजन घिमिरेले १ विकेट लिए ।
– यस समाचारको श्रोत : Online Khabar हो ।