कार्मका भाइ कुन्दुन पनि अब फिल्मका हिरो, यस्तो छ ‘गुलेली’को फस्टलुक
काठमाडौं । अभिनेता कार्म पछिल्लो समयका अब्बल फिल्म कलाकार हुन् । उनको पछिल्लो फिल्म ‘शाम्बाला’ले फिल्म फेस्टिभलमा इतिहास रच्यो । अब उनका भाई कुन्दुन पनि दाजुको पद्चापलाई पछ्याउने तयारीमा छन् ।
कुन्दुनको डेब्यु फिचर ‘गुलेली’ तिहारपछि प्रदर्शनको लागि तयार छ । छोटो फिल्मको चर्चित नाम अनिल न्यौपानेको कथानक फिल्म ‘गुलेली’बाट शीर्ष अभिनेताको रुपमा कुन्दुनले डेब्यु गर्न लागेका हुन् ।
कुन्दुनले यसअघि छोटो फिल्म ‘थस्र्डे’सहित बज्र थिएटरमा ४ नाटकमा अभिनय गरे । चाँडै उनी भूषण दाहालका छोरा आर्जवले निर्देशन गर्न लागेको फिचर फिल्ममा पनि देखिँदैछन् ।
‘गुलेली’मा कार्म र उनका बुवा महेन्द्र लगानीकर्ताको रुपमा छन् । परिवार नै सहभागि भएर बनाएको यो फिल्मबाट कुन्दुनले कथानक फिल्मको यात्रा थाल्न लागेका हुन् । ज्याज प्रोडक्सनको ब्यानरमा बन्न लागेको फिल्मको तयारी कोभिड लकडाउनको समयमै सुरु भएको कार्मले बताए ।
फिल्मको शीर्ष भूमिकामा कुन्दुन र लुनिभा तुलाधर देखिँदैछन् । यो फिल्मले काठमाडौंमा बसोबास गर्ने एक युवालाई पछ्याउँछ जसले केही चीज प्राप्त गर्छ र उसलाई जिन्दगीमा अघि बढ्न सजिलो हुन्छ ।
फिल्मको फस्टलुक पोस्टर सार्वजनिक भएको छ । तिहारपछि कार्म भने केदार श्रेष्ठले निर्देशन गर्ने मण्डला थिएटरको लाइनअप ‘ढुकढुकी ७२ मेगाहर्ज’मा ब्यस्त हुनेछन् ।
– यस समाचारको श्रोत : Online Khabar हो ।