यो साता सेयर बजारमा ७ कम्पनी १५ प्रतिशतभन्दा धेरै बढे

४ फागुन, काठमाडौं । गत साता २०९६ अंकमा रहेको सेयर बजारको नेप्से परिसूचक यो साता २०६२ अंकमा कायम भयो । गत साताको तुलनामा नेप्से यो साता १.६२ प्रतिशत घटेको छ ।

पाँच दिन भएको कारोबारमा दुई दिन बजार बढ्यो भने तीन दिन घट्यो । पहिलो दिन आइतबार १०.५ अंक घटेको बजार सोमबार १५.३ बढ्यो । मंगलबार फेरि ३०.५६ अंक घटेको बजार बुधबार जम्मा ५.९ अंक बढ्यो । अन्तिम कारोबार दिन बिहीबार १४.४ अंक घट्यो ।

समग्रमा यो साता बजार घटे पनि कारोबार रकम उल्लेख्य छ । आइतबार ४ अर्ब ८ करोड, सोमबार ३ अर्ब ५८ करोड, मंगलबार ४ अर्ब ६६ करोड, बुधबार ४ अर्ब २५ करोड र बिहीबार ३ अर्ब ८६ करोडको कारोबार भयो ।

हाइड्रोपावर सकारात्मक लयमा
यो साता समग्र बजार घट्दा पनि तीन समूह फाइनान्स, हाइड्रोपावर र विकास बैंक समूह सकारात्मक रहे । बाँकी समूह भने घटेका छन् । फाइनान्स समूह सबैभन्दा धेरै २ प्रतिशत बढ्यो । यो समूह बुधबार ६.५ प्रतिशत बढ्दा साताभरि सकारात्मक देखियो ।

तर, हाइड्रोपावर समूह सकारात्मक लयमा देखिन्छ । गत साता यही समूह सबैभन्दा धेरै ३.२८ प्रतिशत बढेको थियो । यो साता केही ‘करेक्सन’ आउन सक्ने अनुमानबीच १ प्रतिशत बढ्यो । बजार बढ्दा पनि समूह बढ्नुले यस क्षेत्रप्रति लगानीकर्ताको मनोभाव सकारात्मक रहेको जनाउँछ ।

हाल समूहगत रूपमा सबैभन्दा धेरै रकम कारोबार हाइड्रोपावरमै भइरहेको छ । कुल कारोबारमा करिब आधा रकम यही समूहको हुने गरेको छ । कुल कारोबारमा हाइड्रोपावर समूहको मात्रै आइतबार ४० प्रतिशत, सोमबार ४६, मंगलबार ५७, बुधबार ४१ र बिहीबार ५५ प्रतिशत हिस्सा रह्यो ।

अर्कातर्फ, यो साता धेरै मूल्य बढेका कम्पनीमा पनि हाइड्रोपावर कम्पनी अगाडि देखिए । पूँजीगत लाभ लिने उद्देश्यले कारोबारीहरू थोरै पूँजी भएका हाइड्रोपावर कम्पनीमा लागेको देखिन्छ । जसले थोरै पूँजीका हाइड्रोपावर कम्पनीको मूल्यवृद्धि राम्रो देखिए पनि ठूलो पूँजीका भने धेरै बढ्न सकेका छैनन् ।

सेयर संख्या कम भएका कम्पनीको मूल्य बढ्यो
बजारमा सूचीकृत सेयर संख्या न्यून भएका कम्पनीको मूल्य बढेको पाइएको छ । सेयर संख्या कम भएका कम्पनीलाई निश्चित समूहले मूल्यमै प्रभाव पार्न सक्ने क्षमता राख्छ । तसर्थ, वित्तीय स्थिति कमजोर हुँदा पनि यस्ता कम्पनीको मूल्यलाई ठूलो असर पर्दैन । यस्ता कम्पनीको मूल्यवृद्धि दिगो नहुन सक्छ ।

बोटलर्स नेपाल बालाजु बाहेक मूल्य बढेका अरू सबै कम्पनीको हालको मूल्य प्रतिसेयर नेटवर्थको तीन गुणाभन्दा धेरै छ । तसर्थ, मूल्य बढेका अरू कम्पनीलाई वित्तीय स्थितिले साथ दिँदैन ।

समाज लघुवित्तको सूचीकृत साधारण सेयर संख्या ९८ हजार २ सय ५५ कित्ता छ । यद्यपि, यो कम्पनी हालै सूचीकृत भएको हो । त्यस्तै बोटलर्स नेपालको ४ लाख ८७ हजार कित्ता, जोशी हाइड्रो १६ लाख ९० हजार, सुपरमाइ हाइड्रो १० लाख, बलेफी ३६ लाख ५५ हजार, दोल्ती १६ लाख ९ हजार र सामलिङ पावरको १२ लाख ३० हजार कित्ता साधारण सेयर सूचीकृत छ ।

एनआईसी गिरावटमा अनर्गल प्रचारको असर
यो साता धेरै मूल्य घटेका कम्पनीमध्ये एउटा वाणिज्य बैंक परेको छ– एनआईसी एसिया । वाणिज्य बैंकहरूको मूल्य उतारचढाव सामान्यत: न्यून हुने गर्छ ।  ‘अराजक’ व्यवसायी दुर्गा प्रसाईंले बैंकमाथि झुटो प्रचार गरेपछि यसको मूल्यलाई असर पारेको छ ।

यस बैंकको सेयर मूल्य तीन वर्षयताकै न्यूनमा झरेको छ । तीबाहेक अरू कम्पनी यसअघि जसरी वित्तीय स्थितिको वास्तविकता भन्दा उच्च दरले बढे, अहिले त्यसैगरी घटिरहेका छन् । कम्पनीको वास्तविक वित्तीय स्थिति सुहाउँदो गरी यी कम्पनीको मूल्य तय हुन खोजेको देखिन्छ ।

– यस समाचारको श्रोत : Online Khabar हो ।