रविसँग ३ दिनमा साढे २३ घण्टा बयान

२९ कार्तिक, बुटवल । रास्वपा सभापति तथा पूर्वगृहमन्त्री रवि लामिछानेले तीन दिनसम्म भएको बयानमा बुटवलको सुप्रिम सहकारीको बचत रकम अपचलनमा आफ्नो संलग्नता अस्वीकार गरेका छन् । सरकारी वकिल कार्यालय रुपन्देहीमा मंगलबार, बुधबार र बिहीबार गरी साढे २३ घण्टाको बयानमा लामिछानेसँग ७४ वटा प्रश्न गरिएको थियो ।

सहकारीको वचत अपचलन र संगठित अपराध आरोपमा अनुसन्धानका क्रममा लामिछानेसँग भैरहवामा मंगलबार मौखिक तथा बुधबार र बिहीबार ७४ वटा लिखित प्रश्न सोधिएको थियो । ती प्रश्नको जवाफमा लामिछानेले सहकारीको वचत अपचलनमा आफ्नो संलग्नता अस्वीकार गरेका अनुसन्धानमा संलग्न अधिकृतले जानकारी दिए ।

उनका अनुसार मौखिक र लिखित सबै प्रश्नमा लामिछानेले सहकारी ठगीमा आफू संलग्न नभएको बयान दिंदै आफ्नो नाममा कसले ऋण लगेको हो आफूलाई जानकारी नभएको बताएका थिए । लामिछानेले सहकारी रकमका विषयमा जीवी राई र सागर केसीलाई सोध्नुपर्ने भनेको ती अधिकृतले बताए ।

सागर केसी सुप्रिम सहकारीका व्यवस्थापक हुन् । जीवी र सागर दुबै फरार छन् । लामिछानेसंग पहिलो दिन ३ घण्टा ३५ मिनेट, दोस्रो दिन १० घण्टा र तेस्रो दिन पनि करिब १० घण्टा बयान लिइएको थियो । बयानका क्रममा लामिछानेले हरेक प्रश्नको सहजरुपमा जवाफ दिएका अनुसन्धान अधिकृतको भनाइ छ । ‘उहांले सबै प्रश्नको सहजरुपमा जवाफ दिनुभएको छ, सहकारी ठगीमा आफ्नो संलग्नता नरहेको उहांको दावी छ’–उनले भने ।

पोखराको सुर्यदर्शन सहकारी ठगी र संगठित अपराध कसुरमा अनुसन्धानका लागि कास्की प्रहरी हिरासतमा २६ दिनसम्म रहेका उनलाई मंगलबार रूपन्देही ल्याइएको थियो । पहिलो दिनको बयान सकिएर जिल्ला सरकारी वकिलको कार्यालयबाट बाहिरिने क्रममा लामिछानेले समर्थकलाई हात हल्लाउंदै ‘खोरमा थुन्दैमा बाघ स्याल हुंदैन’ भनेका थिए ।

बुटवलको सुप्रिम सहकारीबाट लामिछानेको नाममा एक करोड ९६ लाख रुपैयाँ गोर्खा मिडिया नेटवर्क प्रालिमा गएको संसदीय विशेष छानबिन समितिको प्रतिवेदनमा उल्लेख छ। जोशी र लामिछानेसहित जीबी राई, भूपेन्द्रबाबु राई, कुमार रम्तेल र गोर्खा मिडिया नेटवर्कका नाममा गरी सुप्रिम सहकारीबाट १४ करोड २९ लाख ३६ हजार रुपैयाँ रकम पठाइएको छानबिन समितिको प्रतिवेदनमा उल्लेख छ।

प्रहरीले सुप्रिम सहकारीका अध्यक्ष ओमप्रकाश गुरुङसहित २८ जनाविरुद्ध जिल्ला अदालत रूपन्देहीमा मुद्दा दायर गरेको थियो। अहिले सहकारीका अध्यक्ष गुरुङ पुर्पक्षका लागि जिल्ला कारागार रूपन्देहीमा छन् भने सहकारीका पूर्वसचिव दीपेश पुनसहित ६ जना धरौटीमा रिहा भइसकेका छन् । कास्की प्रहरीको हिरासतबाट भैरहवा ल्याइएका कुमार रम्तेल र शिवबहादुर गुरुङको बयान भइसकेको छ ।

लामिछानेसहित १२ जनाविरुद्ध सुप्रिम बचत तथा ऋण सहकारी संस्थाको बचत रकम हिनामिना गरेको आरोपमा रुपन्देही जिल्ला अदालतले कात्तिक ८ गते पक्राउ पूर्जी जारी गरेको थियो ।

संस्थाका पूर्वअध्यक्ष गितेन्द्रबाबु (जीवी) राई र पूर्वउपराष्ट्रतिका छोरा एवं सुप्रिम सहकारीका पूर्वसचिव दीपेश पुनसहित २८ जनालाई प्रतिवादी बनाई मुद्दा दर्ता गर्दा लामिछानेलाई प्रतिवादी बनाइएको थिएन ।

त्यो बेला लामिछाने गृहमन्त्री थिए । तर, अहिले प्रहरीले लामिछानेविरुद्ध पूरक अनुसन्धान प्रतिवेदन लैजाने गरी अनुसन्धान गरिरहेको हो ।प्रहरीले अहिले तयार गरिरहेको अनुसन्धान प्रतिवेदनमा लामिछानेको नाममा प्रवाह गरिएको ऋणको भौचर सुप्रिम सहकारीका व्यवस्थापक सागर केसीले सदर गरेका छन् ।

गुल्मीको मालिका गाउँपालिका–८ घर भएका ३० वर्षीय सागर केसी अहिले फरार छन् । केसीले भौचर सदर गरेर रोशनी गुरुङले गोरखा मिडिया नेटवर्कको नाममा रहेको बैंक खातामा रकम जम्मा गरेको अभियोग पत्रमा उल्लेख छ । रोशनी यसअघि नै अदालतबाट धरौटीमा रिहा भएकी छन् ।

जिल्ला प्रहरी कार्यालय रुपन्देहीका अनुसार सहकारीका १८ सय ३१ जनाले आफूहरुको ८६ करोड बढी वचत अपचलन भएको भन्दै प्रहरीमा उजुरी दिएका थिए । सहकारीका १० हजार ३ सय ९१ बचतकर्ताले जम्मा गरेको १ अर्ब ७ करोड रकममध्ये ८६ करोड १८ लाख २३ हजार अपचलन भएपछि अनुसन्धान प्रक्रिया अघि बढेको हो ।

मुद्दा दायर भएका २८ जना मध्ये ८ जना पक्राउ परेका छन् । जसमा २ जना कास्की र एक जना रुपन्देही कारागार रहेका छन् भने ५ जना धरौटीमा रिहा भएका छन् ।
सहकारीको रकम विभिन्न व्यक्ति र कम्पनीका नाममा पठाउने मुख्य आरोपी पूर्वअध्यक्ष जीबी राई र बुटवलस्थित मुख्य कार्यालयका व्यवस्थापक सागर केसी सहित १९ जना फरार छन्।

लामिछाने र छविलाल जोशीसहित पछिल्लोपटक पक्राउ पुर्जी जारी हुनेमा रुपन्देहीका दीपक लामा, अनन्तबाबु राई, नरेश जिसी, शिवबहादुर गुरुङ, श्रीबल्लव नेपाल, विशाल तामाङ , रविना रिमाल, भगवती बमजन, विज्ञान राई, सुरक्षा अधिकारी रहेका छन् ।

लामिछानेलाई शुक्रबार मात्र पोखरा पठाइने भएको छ ।

– यस समाचारको श्रोत : Online Khabar हो ।