पानीजहाज कार्यालयले पायो १५ करोड
१७ जेठ, काठमाडौं । सुनकोशी र नारायणी नदीमा जलयात्रा निर्माण गर्ने घोषणा गरेको सरकारले यो काम कार्यान्वयन गर्ने जिम्मेवारी पाएको पानीजहाज कार्यालयलाई १५ करोड रुपैयाँ विनियोजन गरेको छ ।
अर्थ मन्त्रालयका अनुसार नेपाल पानीजहाज कार्यालयले १५ करोड ६ लाख रुपैयाँ आगामी आर्थिक वर्ष (आव) २०८१/८२ का लागि पाएको हो ।
यो कार्यालयले चालु आव २०८०/८१ मा ४ करोड ९ लाख खर्च गर्ने अनुमान छ । यसअघिको आवमा यो कार्यालयले ३ करोड ३० लाख खर्च गरेको थियो ।
सरकारले आगामी आवको बजेटमा सुनकोशी र नारायणी नदीमा जलमार्ग निर्माण थाल्ने बताएको छ ।
नारायणी नदीमा सञ्चालित जलयानमा यात्रु चढ्न र ओर्लन सहज र सुरक्षित हुने गरी टर्मिनल निर्माण गर्ने योजना समेत सरकारले बजेटमार्फत घोषणा गरेको छ ।
भौतिक मन्त्रालयका लागि सरकारले कुल १ खर्ब ५० अर्ब रुपैयाँ बजेट विनियोजन गरेको छ । यसको ठूलो हिस्सा सडक आयोजनाहरूले पाउने छन् ।
– यस समाचारको श्रोत : Online Khabar हो ।