चन्द्रागिरि र काठमाडौं गोदावरी मेयर कपको फाइनलमा
३ जेठ, ललितपुर । चन्द्रागिरि नगरपालिका र काठमाडौं महानगरपालिका गोदावरी नगरपालिकाको आयोजनामा जारी प्रथम उपत्यकाव्यापी अन्तरपालिका खुला मेयर कप फुटबल प्रतियोगिताको उपाधिका लागि प्रतिस्पर्धा गर्ने भएका छन् ।
चन्द्रागिरि, महालक्ष्मी नगरपालिकालाई तथा काठमाडौं, मध्यपुर थिमि नगरपालिकालाई हराउँदै प्रतियोगिताको फाइनलमा पुगेका हुन् ।
ललितपुरको च्यासल खेल मैदानमा बिहीबार सम्पन्न पहिलो सेमिफाइनल खेलमा महालक्ष्मी नगरपालिकालाई १–० ले हराउँदै चन्द्रागिरि नगरपालिका फाइनलमा प्रवेश गरेको हो ।
चन्द्रागिरिले खेलको ५५औँ मिनेटमा महालक्ष्मीका निशान रावलको आत्मघाती गोल उपहार पाएको थियो ।
सो खेलको म्यान अफ दि म्याच चन्द्रागिरिका सिल्भा कन्दाग्वा भए । उनलाई गोदावरी नगरपालिकाको तर्फबाट ५ हजार नगद र ट्रफी महालक्ष्मी नगरपालिकाकी उपमेयर लक्ष्मी मर्हजनले हस्तान्तरण गरिन् ।
खेलमा उदयमान खेलाडीको ट्रफी महालक्ष्मीका निशान बस्नेतले पाए । उनलाई महालक्ष्मीकी उपमेयर मर्हजन र गोदावरी नगरपालिका वडा नम्बर १० मा रहेको वेलकम पार्टी प्यालेसका संचालक सुवास पुडासैनीले संयुक्त रुपमा ट्रफी प्रदान गरे ।
यसैगरी अर्को सेमिफाइनल खेलमा मध्यपुर थिमी नगरपालिकालाई १–० ले नै हराएर काठमाडौं महानगरपालिकाले फाइनलमा स्थान सुरक्षित गरेको छ ।
महानगरका लागि मनीष सेढाईले गरेको एक मात्र गोल निर्णायक भयो । उनले खेलको ५३औँ मिनेटमा गोल गरेका हुन् ।
खेलमा म्यान अफ दि म्याच काठमाडौंका अनिल खड्का भए । उनलाई मध्यपुर थिमिका प्रवक्ता कृष्णहरि आचार्यले ट्रफी र ५ हजार नगदको चेक हस्तान्तरण गरे ।
खेलमा मध्यपुरका अमर श्रेष्ठ उदयमान खेलाडी घोषित भए । उनलाई प्रतियोगिता संयोजक निरोज बज्राचार्यले ट्रफी प्रदान गरे ।
वर्षाका कारण गोदावरी बहुउद्देश्यीय रङ्गशालाको झ्यालुन्टार मैदानमा खेल हुन नसकेपछि दुवै सेमिफाइनलका खेल च्यासलमा खेलाइएको थियो ।
फाइनल खेल भने झ्यालुन्टार मैदानमै खेलाइने छ । फाइनल खेल शनिबार दिउँसो हुनेछ ।
उपत्यकाभित्रका १४ वटा पालिकाका १५ वटा टिमले यो प्रतियोगितामा प्रतिस्पर्धा गरिरहेका छन् ।
प्रतियोगिताको विजेता टिमले ५ लाख र उपविजेताले ३ लाख पुरस्कार पाउने छन् ।
यस्तै अनुशासित टिमलाई ५० हजार तथा उत्कृष्ट गोलकिपर, डिफेन्डर , फर्वाड, सर्बाधिक गोलकर्ता र उत्कृष्ट प्रशिक्षकलाई जनही २५ हजार रुपैयाँ प्रदान गरिनेछ ।
– यस समाचारको श्रोत : Online Khabar हो ।