रूख नकाट्न रतुवामाई नगरपालिकाको नाममा अल्पकालीन अन्तरिम आदेश
८ असोज, विराटनगर। उच्च अदालत विराटनगरले सडक विस्तारको नाममा रुख नकाट्न रतुवामाई नगरपालिकाको नाममा अल्पकालिन अन्तरिम आदेश जारी गरेको छ ।
मंगलबार न्यायाधीश केशवप्रसाद बास्तोलाको इजलासले रुख नकाट्न नगरपालिकाको नाममा अल्पकालिन अन्तरिम आदेश जारी गरेको हो ।
रतुवामाई नगरपालिकाले सडक किनारमा रहेका रुख भदौ ३० गतेबाट काट्न सुरु गर्ने भन्दै भदौ २८ गते सूचना जारी गरेको थियो ।
पालिकाले जारी गरेको सूचना रोक्न र बोटविरुवाको संरक्षणको माग गर्दै अभिवक्ताद्वय विनोदमणि भट्टराई र लबन न्यौपानेले रिट दायर गरेका थिए ।
सोही रिटमा उच्च अदालतले अल्पकालीन अन्तरिम आदेश जारी गरेको हो । उच्च अदालतले १५ दिनभित्र लिखित जवाफसहित उपस्थित हुन विपक्षीलाई भनेको छ ।
साथै रिट निवेदकले माग गरेको अन्तरिम आदेशको सन्दर्भमा छलफल गर्न दुवै पक्षलाई असोज १४ गते उपस्थित हुन पनि उच्च अदालतले आदेश दिएको छ ।
– यस समाचारको श्रोत : Online Khabar हो ।