लुम्बिनीका मुख्यमन्त्री आचार्य र स्विट्जरल्यान्डका राजदूतबीच भेटवार्ता
७ मंसिर, दाङ । लुम्बिनी प्रदेशका मुख्यमन्त्री चेतनारायण आचार्य स्वीट्जरल्याण्डका राजदूत डानियल मेउल्ली मोन्टेलोबीच भेटवार्ता भएको छ। मुख्यमन्त्री तथा मन्त्रिपरिषद्को कार्यालय देउखुरीमा शुक्रबार भएको भेटवार्तामा लुम्बिनी प्रदेशको विकास र समृद्धिमा स्विस सरकारले हाल गर्दै आएको सहयोगबारे छलफल भएको सचिवालयले जनाएको छ ।
मुख्यमन्त्री आचार्यले प्रदेश तह आत्मनिर्भर हुने चरणमा रहेकाले यो अवधिमा दातृ निकायहरुको साथ सहयोग आवश्यक पर्ने भन्दै पूर्वाधार देखि सामाजिक विकासमा सहयोग आवश्यक परेको बताए । लुम्बिनी प्रदेशभित्र मानसिक स्वास्थ्य समस्या र बढ्दो आत्महत्यादर, मातृ शिशु मृत्युदर, बाल मृत्युदर, कुपोषणको समस्या उच्च रहेकाले ती समस्या समाधान गर्न पनि साझेदारी गर्न प्रदेश सरकार तयार भएको उनले बताए ।
यसका साथै लुम्बिनी प्रदेश सरकारले प्रादेशिक मानसिक स्वास्थ्य तथा मनोसामाजिक रणनीतिक कार्ययोजना निर्माण गरेको र अब त्यसलाई प्रभावकारी कार्यान्वयनमा लगिने मुख्यमन्त्री आचार्यले जानकारी गराए । हाल स्वीस सरकारको सहयोगमा बर्दिया जिल्लामा मात्रै मानसिक स्वास्थ तथा मनोसामाजिक सेवा कार्यक्रम लागू भएको छ । यो कार्यक्रमलाई प्रदेशका सबै जिल्लामा विस्तार गर्न मुख्यमन्त्रीले आग्रह गरे ।
प्रदेश सरकारले मानसिक स्वास्थ्य तथा मनोसामाजिक सेवा रणनीतिक योजना निर्माण गरेकोमा राजदूत डानियल मेउल्ली मोन्टेलोने सरकारप्रति बधाई दिइन् ।
– यस समाचारको श्रोत : Online Khabar हो ।