लुम्बिनी एक्स्पोमा प्रदेश पर्यटन गुरुयोजनाको खोजी

१७ पुस, बुटवल । लुम्बिनीसहित दर्जनौं पर्यटकीय स्थल भएर व्यवस्थित योजना बनाएर पर्यटन क्षेत्रको विकासमा काम गर्न नसक्दा धेरै लाभ लिन नसकेको सरोकारवालाले बताएका छन् ।

प्रादेशिक पर्यटन गुरुयोजना नहुंदा तीनै तहका सरकारको पर्यटन वजेट हचुवाको भरमा र छरिएर खर्च हुंदा अनुत्पादक भएको र अत्यावश्यक पर्यटन पुर्वाधार बन्न नसकेको उनीहरुको भनाइ छ ।

रुपन्देही ब्यापार संघले बुटवलमा सञ्चालन गरेको लुम्बिनी एक्स्पो अन्तर्राष्ट्रिय ब्यापार मेलामा आयोजित पर्यटन प्रवद्र्धन विषयक अन्तर्क्रियामा प्रादेशिक पर्यटन गुरुयोजना निर्माणलाई पहिलो प्राथमिकता दिनुपर्ने सरोकारवालाको भनाइ थियो ।

प्रदेश पर्यटन विकास परिषदका प्रमुख रामु जोशीले प्रदेशको पञ्चवर्षीय योजनामा पर्यटन गुरुयोजना पनि समेट्ने तयारी भइरहेको बताए । मुलुक संघीय संरचनामा गएको धेरै लामो समय नभएकाले प्रदेश पर्यटन गुरुयोजना निर्माण नभएको भन्दै अब ढिलाइ गर्न नहुने जोशीले बताए ।

‘प्रदेशमा बुद्धजन्मस्थल लुम्बिनीसहित तिलौराकोट, रामग्राम र देवदहदेखि रुकुमको सिस्ने हिमालसम्मका २ सय ८३ वटा पर्यटकीय गन्तव्य छन्’, जोशीले भने, ‘यी सबै स्थानमा पर्यटकीय पूर्वाधार बनाउने गरी गुरुयोजनामा समेट्ने सरकारको तयारी छ ।’ गुरुयोजनामा हरेक स्थानीय तहमा पर्यटन शाखा र पर्यटन विकास समिति गठनलाई अनिवार्य गरिने र पर्यटनमा हुने खर्चलाई एकीकृत लगानी गरेर छिटो प्रतिफल आउने गरी काम गर्नुपर्ने उनले बताए ।

पर्यटकलाई प्रदेशमा आकर्षित गरी बसाइ लम्ब्याउन सुविधायुक्त फराकिलो पार्किङस्थल र पर्यटक बस चाहिने जोशीले सुझाए । बेलहिया नाकाबाट आउने पर्यटक सिधै पोखरा जाने परिपाटी रोकेर बुटवलमा बास बस्ने वातावरण बनाउन होटेल र पर्यटन व्यवसायीले खानाका परिकारमा बुटवलको छुट्टै ब्राण्ड सहित टुर प्याकेज बनाउनुपर्ने जोशीले सुझाए ।

बुटवलका पुराना पर्यटन व्यवसायी माधव नेपालले तिनाउ नदीमा जलाशययुक्त ड्याम बनाएर बाह्रैमास पानी बग्ने बनाइ डुंगा शयर र जल पर्यटनको विकास गर्नुपर्ने बताए । उनले अंग्रेज फौजलाई नेपाली फौजले हराएको ऐतिहासिक जितगढी किल्लामा नेपाल–अंग्रेज युद्धको झल्को दिने यद्ध संग्रहालय बनाउने र यसलाई अन्तर्राष्ट्रियकरण गरी पर्यटक भित्राउन गुरुयोजना बनाउनुपर्ने सुझाए ।

‘चिडियाखोलादेखि दक्षिणमा मगरघाटसम्म जलाशय बनाउने र नदीको दुबैतर्फ पक्की सडक बनाई जल पर्यटनको विकास गर्ने हो भने यहां पर्यटकलाई आकर्षित गरी भुलाउन सकिन्छ’, नेपालले भने, ‘जल पर्यटनसंगै जितगढीमा यद्ध संग्रहालय पनि बनाउनुपर्छ ।’

पर्यटनविज्ञ बलबहादुर आचार्यले प्रदेशको पर्यटन गुरुयोजना बनाएर मात्र पर्यटन पुर्वाधारमा लगानी गर्नुपर्ने बताए । योजनाविनाको कनिका छराई लगानीले पर्यटकमैत्री पूर्वाधार बनाउन नसकिने भएकाले गुरुयोजना अनुसार विविधतायुक्त र विशिष्टीकृत सेवा पर्यटकलाई पस्कन सक्नुपर्ने बताए ।

उद्योग वाणिज्य संघ बुटवलका उद्योग उपाध्यक्ष सुरज भट्टराईले जितगढी किल्लामा सन्ध्या आरती, सैनिक परेड, जातीय सांस्कृतिक नाच पर्यटकलाई देखाउन सके पर्यटक आकर्षित हुने बताए ।

रुपन्देही उद्योग संघका वरिष्ठ उपाध्यक्ष कृष्ण पराजुलीले पर्यटकले चाहे जति रकम ल्याउन दिए मात्रै पर्यटन व्यवसायबाट लाभ लिन सकिनेमा सरकारी नीति वाधक भएको औंल्याए । उनले पुरानो बुटवल बजारलाई पुरानै शैलीमा पुनःनिर्माण गर्नसके पर्यटकका लागि आकर्षक गन्तव्य हुने सुझाए ।

लुम्बिनी होटल व्यवसायी संघका महासचिव पुरुषोत्तम अर्यालले पर्यटन गुरुयोजना र टुर प्याकेज नहुँदा लुम्बिनी आउने ७० प्रतिशत पर्यटक बास नबसी फर्कने गरेको बताए ।

‘पर्यटन गुरुयोजना नबन्दा पर्यटकको बसाइ लम्ब्याउन सकिएको छैन’, उनले भने, ‘पर्यटकलाई जबरजस्ती बसाल्न खोजेर मात्रै बस्दैनन् यहां अनुदानमा पर्यटक बस समेत चल्न सकेका छैनन्, सरकारी नीति नै बाधक छ ।’

बस ब्यवसायी जीवन बन्जाडेले बेलहिया नाका आसपासमा त्यहांका होटेल व्यवसायीले राति ८ बजेपछि कुनै पनि बसलाई चल्न नदिंदा पर्यटक बुटवल आउन नसकेको औंल्याए ।

रुपन्देही ब्यापार संघका अध्यक्ष कृष्णप्रसाद घिमिरे, पूर्वअध्यक्ष मोतीलाल पाण्डे, मोतीराज ज्ञवाली, व्यवसायी दिवाकर घिमिरे लगायतले लुम्बिनी एक्स्पो ब्यापार मेला मात्र नभई पर्यटन प्रवद्र्धन गर्ने माध्यम पनि भएको बताए ।

– यस समाचारको श्रोत : Online Khabar हो ।