लोप हुँदै काठे पिङ
२८ असोज, गुल्मी । दशैंका बेला खेलिने चर्खे पिङ (काठे पिङ) गुल्मीमा हराउँदै जान थालेको छ । मेला महोत्सवमा बिजुलीबाट चल्ने ठूला खालका पिङहरु राख्ने गर्नाले स्थानीयस्तरमै तयार गरिने काठे पिङको चलन हराउँदै जान थालेको हो ।
गुल्मी जिल्लाका केही स्थानमा मात्र रोटे पिङ पनि भनिने चर्खे पिङ अर्थात् काठे पिङ देख्न सकिन्छ । जिल्लाको पश्चिम इस्मा, मालिका, मदाने तिर काठबाट तयार गरिएका पिङ भेटिन्छन् ।
यी पिङ दशैंका बेला खेलिने सराय नाच हुने स्थानमा राख्ने गरिएको छ । यतिबेला गुल्मी जिल्लाका विभिन्न स्थानमा दशैंको टीकापछि सराय नाच भइरहेका छन् । आयोजकले ती स्थानहरुमा काठे पिङ जडान गर्ने र निश्चित शुल्क लिएर खेलाउने गर्दछन् ।
काठे पिङ खेल्नेहरुबाट प्रतिव्यक्ति पचास रुपैयाँसम्म लिने गरिएको छ । काठे पिङ व्यवसायीहरुले दशैंको समयमा मात्रै चलाउँदा पनि राम्रो आम्दानी गर्दछन् ।
वर्षको एक दिन भुइँ छाड्नुपर्छ भन्ने मान्यता अनुसार धेरैले पिङ खेल्न रुचाउँछन् । लिङ्गे पिङ प्राय देखिने गरे पनि चर्खे पिङ अर्थात् काठे पिङ भने धेरै ठाउँबाट हराउँदै गएको छ ।
चर्खे पिङ बनाउन ठूला–ठूला काठ चाहिने र काठ पाउन मुस्किल पनि हुने भएकाले यस्ता पिङको चलन कम हुँदै गएको छ ।
नयाँ पिँढीलाई चर्खे पिङबारे थाहा नहुने भएकाले यसको संरक्षण गर्नुपर्ने इस्मा २ का अर्जुन नेपाली बताउँछन् ।
– यस समाचारको श्रोत : Online Khabar हो ।