जलवायु जोखिमबारे पर्वतीय र सामुद्रिक देशले साझा कार्यक्रम बनाउनुपर्छ : राष्ट्रपति पौडेल
२८ कात्तिक, बाकु, अजरबैजान । राष्ट्रपति रामचन्द्र पौडेलले जलवायु जोखिमबाट जोगिन पर्वतीय र सामुद्रिक देश मिलेर साझा कार्यक्रम बनाउनुपर्ने बताएका छन् ।
अजरबैजानको बाकु शहरमा सोमबार सुरु भएको जलवायु परिवर्तनसम्बन्धी संयुक्त राष्ट्र संघीय सम्मेलन (कोप–२९) अन्तर्गतको कार्यक्रममा उनले यस्तो बताएका हुन् ।
कोप २९ मा बुधबार नेपालले ‘माउण्टेन इन पेरिल, एड्रेसिङ लस एण्ड डयामेज इन द हिमालय’ ( पर्वतीय क्षेत्रमा जलवायुजन्य हानि तथा नोक्सानीको सम्बोधन’) शीर्षकको उच्चस्तरीय राउण्ड टेबल आयोजना गरेको थियो ।
जहाँ राष्ट्रपति पौडेलले भने, ‘पहाडी देशमा परेको जलवायु जोखिमको प्रभाव सामुद्रिक देशमा पर्न सक्ने र सामुद्रिक किनार माथि उठ्न सक्ने भएकोले आउदा दिनमा पर्वतीय देश र सामुद्रिक देश मिलेर साझा कार्यक्रमका साथ एकीकृत रुपमा काम गर्न म हार्दिक आह्वान गर्दछु ।’
उनले मुख्य गरी कार्वन उत्सर्जन गर्ने विकसित राष्ट्र र उच्च दरमा आर्थिक वृद्धि गर्ने राष्ट्रले उच्च जलवायु जोखिममा परेका राष्ट्रको लागि बढी सहयोग गर्नुपर्ने बताए ।
‘बढी भन्दा बढी जलवायु वित्तको व्यस्थापन गर्न २९ औं जलवायु सम्मेलन सफल हुने मेरो विश्वास छ’, राष्ट्रपति पौडेलले भने ।
जलवायु परिवर्तन सबैको साझा चुनौती भएको र यसको साना गर्न साझा बुझाइ र साझा प्रयास गर्नुपर्ने उनले बताए ।
‘जलवायु परिवर्तनका उस्तै प्रभावित राष्ट्रलाई एकै ठाउमा राखेर छलफल गर्दा समस्याको वारेमा बुझ्न र समाधन गर्न पनि सहज हुने हाम्रो विश्वास हो’, उनले भने ।
– यस समाचारको श्रोत : Online Khabar हो ।