वाफ वुमन्स च्याम्पियनसिपको लागि एन्जिलाको कप्तानीमा नेपाली टोली घोषणा

२९ माघ, काठमाडौं । साउदी अरेबियामा यही फेब्रअरी १९ देखि सुरु हुने वाफ वुमन्स च्याम्पियनसिप २०२४ का लागि २३ सदस्यीय नेपाली टोली घोषणा भएको छ ।

नेपाली टोलीका मुख्य प्रशिक्षक राजेन्द्र तामाङले सोमबार एन्जिला तुम्बापो सुब्बाको कप्तानीमा टोली घोषणा गरेका हुन् ।३१ जनाबाट अन्तिम २३ जना छनोट गर्दा तीन नयाँ अनुहार छन् । डिफेण्डर सविना चौधरी तथा मिडफिल्डर सरस्वती हमाल र चन्द्र भण्डारीलाई पहिलो पटक सिनियर टिममा स्थान बनाएका हुन् ।

कप्तान एन्जिलासहित गीता राना, अमृता जैशी, प्रिती राई, दीपा शाही र रश्मीकुमारी घिसिङ हाल भारतमा इन्डियन वुमन्स लिग खेलिरहेका छन् । उनीहरु यस प्रतियोगिताका लागि नेपाल आएर टिममा सामेल हुनेछन् । यस्तै स्ट्राइकर सावित्रा भण्डारी साम्बा फ्रेन्च शीर्ष टोली गुइग्याम्पबाट त्यहाँको लिग खेलिरहेकी छन् । उनी केही समयअघि मात्रै फ्रेन्च क्लबमा अनुबन्ध भएकी थिइन् र दुई खेल खेलिसकेकी छन् ।

भारतमा खेलेका खेलाडीहरु दुई जना सोमबार राति आइपुग्ने र बाँकी खेलाडी भोलि र पर्सिसम्म आइपुग्ने प्रशिक्षक राजेन्द्र तामाङले जानकारी दिए । यस्तै सावित्रा भने प्रतियोगिता खेल्न फ्रान्सबाट सिधै साउदी अरेबिया जाने उनले बताए ।

बन्द प्रशिक्षणमा रहेका सपना राई, गंगा गुरुङ, प्रतिक्षा चौधरी, दीपा न्यौपाने, सम्झना लावती, अन्जली मचामसी, अनुष्का शेर्पा र मनमाया दमाइ भने अन्तिम टोलीमा पर्न सकेनन् ।

नेपालले पहिलो पटक वाफ वुमन्स च्याम्पियनसिप खेल्न लागेको छ । ८ टोलीको सहभागिता रहने उक्त प्रतियोगितामा नेपाल समूह बी मा छ । यस समूहमा नेपालसँगै प्यालेस्टाइन, सिरिया र इराक छन् । आयोजक साउदी अरेबिया, ग्वाम, लेबानोन र जोर्डन समूह ए मा छन् ।

नेपालले सिरियासँग पहिलो खेल खेल्दै च्याम्पियनसिपको सुरुवात गर्नेछ ।

नेपाली टोली

गोलकिपर : एन्जिला तुम्बाप्पो सुब्बा (कप्तान), अन्जना रानामगर, उषा नाथ

रक्षक : अमृता जैसी, गीता राना, हीराकुमारी भुजेल, पुजा राना, विमला विक, निशा थोकर, समिक्षा घिमिरे, सविना चौधरी

मिडफिल्डर : अनिता केसी, विमला चौधरी, अनीता बस्नेत, प्रीति राई, दीपा शाही, सरस्वती हमाल, चन्द्र भण्डारी

फरवार्डः सविता रानामगर, सावित्रा भण्डारी, रश्मी कुमारी घिसिङ, रेखा पौडेल, अमिसा कार्की

– यस समाचारको श्रोत : Online Khabar हो ।