‘विपदमा सामुदायिक रेडियो नै सूचनाको भरपर्दो माध्यम’
१५ जेठ, काठमाडौं । विपद्का समयमा सूचनाका लागि सामुदायिक रेडियो भरपर्दो माध्यम भएको सरोकारवालाले बताएका छन् ।
सामुदायिक सूचना नेटवर्क सीआईएनको १६ औँ स्थापना दिवसको अवसरमा मंगलबार आयोजित कार्यक्रमका सहभागीले रेडियो सूचना र जानकारी प्राप्त गर्नका लागि मात्र नभएर विपद्का बेलाको मनोसामाजिक परामर्शका लागि समेत उपयेगी रहेको धारणा राखेका थिए ।
राष्ट्रिय विपद् जोखिम न्यूनीकरण तथा व्यवस्थापन प्राधिकरणका प्रमुख अनिल पोखरेलले विपद्का समयमा सञ्चारमाध्यमको भूमिका अति नै महत्त्वपूर्ण हुने र त्यसमा पनि सामुदायिक रेडियो अझै प्रभावकारी रहेको पाइएको बताए ।
नेपाल रेडक्रस सोसाइटीको विपद् व्यवस्थापन शाखाका प्रमुख सागर श्रेष्ठले अहिले पनि बहुसंख्यक नेपाली र नेपालको अधिकांश क्षेत्रमा सूचनाको पहिलो स्रोत रेडियो नै रहेको बताए । विपद् जोखिमबारे समुदाय स्तरमा सूचना सम्प्रेषण गर्न सामुदायिक रेडियोले पुर्याइरहेको योगदानको उनले प्रशंसा गरे ।
सामुदायिक वन उपभोक्ता महासङ्घका अध्यक्ष ठाकुरप्रसाद भण्डारीले वन्यजन्तुको आक्रमणबाट सर्वसाधारणको मृत्यु हुन थालेकाले यसको न्यूनीकरणका लागि रेडियोले भूमिका खेल्नुपर्ने बताए ।
सामुदायिक रेडियो प्रसारक संघ अकोराबका अध्यक्ष अर्जुन गिरीले विपद्का समयमा सामुदायिक रेडियोले नागरिकलाई सूचना, सञ्चार, शिक्षा र मनोवैज्ञानिक सहजीकरणमा योगदान गरेका कारण जापान लगायत देशमा राज्यले नै सामुदायिक रेडियोलाई जगेर्ना गरेर राखेको बताए । नेपालका सामुदायिक रेडियोहरूको दिगोपनाका लागि सबैले सोच्नुपर्ने बेला आएको उनको भनाइ छ ।
अकोरावका पूर्व अध्यक्ष सुवास खतिवडाले २०७८ को जनगणनाअनुसार ३४ प्रतिशत नागरिक र दैनिक १ करोड नेपालीले रेडियो नियमित सुन्ने देखाएको बताए ।
कृषक समूह महासङ्घ नेपालका अध्यक्ष पञ्चकाजी श्रेष्ठले सामुदायिक वनदेखि किसान र कृषिको मुद्दामा रेडियोले सधैँ वकालत गरेको बताए ।
१६ औ स्थापना दिवसको अवसर पारेर तीन जना सीआईएनकर्मीलाई पुरस्कारको घोषणा गरिएको छ । जसमा सीआईएन काठमाडौंबाट सजना तिमल्सिना, रेडियो साथी झापाकी शुष्मा राजवंशी र रेडियो मुगु मुगुका खड्क सुनार रहेका छन् । उनीहरुले जनही १५ हजार रुपैयाँ पुरस्कार पाउनेछन् ।
– यस समाचारको श्रोत : Online Khabar हो ।