मान्छे बन्न सकिनँ
मुसुक्क हाँसेर भित्रभित्रै रिस राख्न सकिनँ
काखमा राखेर छुरा धस्न जानिनँ
पर्दापछाडि कुरा काट्न मानिनँ
त्यसैले त म मान्छे बन्न सकिनँ !
मान्छे नै पिच्छे रूप फेर्न सकिनँ
मन नपर्नेबित्तिकै दुश्मन ठान्न सकिनँ
नाफाघाटालाई मात्रै जीवन मान्न सकिनँ
त्यसैले त म मान्छे बन्न सकिनँ !
पैसाले सबथोक किनिन्छ भन्ने ठानिनँ
गरीबको श्रम शोषण गर्न मानिनँ
आफूलाई सर्वेसर्वा ठान्न जानिनँ
त्यसैले त म मान्छे बन्न सकिनँ !
निर्धाहरुलाई लोभ्याएर लुट्न सिकिनँ
आफ्नैसँग कमिसन खान मानिनँ
असत्यसँग सती जान सकिनँ
त्यसैले त म मान्छे बन्न सकिनँ !
कालाबजारी गर्न जानिनँ
दुईनम्बरी धन्दा गर्न मानिनँ
कमजोरीको फाइदा लुट्न सिकिनँ
त्यसैले त म मान्छे बन्न सकिनँ !
स्त्रीलम्पट बन्न मैले कहिल्यै मानिनँ
सहकर्मीको पेटमा लात हान्न सिकिनँ
उत्तर नआउने प्रश्न मैले कहिल्यै सोधिनँ
त्यसैले त म मान्छे बन्न सकिनँ !
अरूको परिश्रम खान सकिनँ
घाँस देखाएर गर्धन काट्न सकिनँ
मैले कसैलाई लुट्नेबारे सोच्न सकिनँ
त्यसैले त म मान्छे बन्न कहिल्यै सकिनँ !!
– यस समाचारको श्रोत : Online Khabar हो ।