वेस्टइन्डिजमाथि अष्ट्रेलियाको सहज जित
१९ माघ, काठमाडौं । घरेलु टोली अष्ट्रेलियाले पहिलो ओडीआई खेलमा वेस्टइन्डिजलाई ८ विकेटले हराएको छ । योसँगै तीन खेलको सिरिजमा १–० को अग्रता लिएको छ ।
जितको लागि २३२ रनको विजयी लक्ष्य पछ्याएको अष्ट्रेलियाले ३८.३ ओभरमा २ विकेट गुमाउँदै पूरा गर्यो ।
कप्तान स्टिभ स्मिथ ७९ बलमा ८ चौकासहित सर्वाधिक ७९ रन बनाए ।
त्यस्तै क्यामरन ग्रीन १०४ बलमा ४ चौका र २ छक्कासहित ७७ रनमा अविजित रहे । ओपनर जोश इंग्लिस ४३ बलमा १० चौका र १ छक्कासहित ६५ रनमा आउट भएका थिए ।
वेस्टइन्डिजका म्याथ्यु फर्ड र गुडाकेश मोतीले १–१ विकेट लिए ।
त्यसअघि मेलबर्न क्रिकेट ग्राउन्डमा टस हारेर पहिला ब्याटिङको निम्तो पाएको वेस्टइन्डिज ४८.२ ओभरमा २३१ रनमा अल आउट भयो । वेस्टइन्डिजका केसी कार्टीले १०८ बलमा ६ चौका र २ छक्कासहित सर्वाधिक ८८ रन बनाए ।
रोश्टन चेशले ६७ बलमा ७ चौकासहित ५९ रन बनाए । अष्ट्रेलियाका डेब्यू खेल खेलेका तीव्र गतिका बलर जेभियर बर्टलेटले ९ ओभरमा १७ रन खर्चेर ४ विकेट लिँदै प्लेयर अफ द म्याच चुनिए ।
सन एबोट र क्यामरन ग्रीनले २–२ विकेट लिए । दोस्रो ओडीआई आइतबार र तेस्रो मंगलबार हुनेछ ।
– यस समाचारको श्रोत : Online Khabar हो ।