वैदेशिक रोजगारीका क्रममा १५ वर्षमा मकवानपुरका १९३ जनाले गुमाए ज्यान
१२ चैत, हेटौंडा । परिवारको खुशी र सुखी जीवन खोज्दै वैदेशिक रोजगारीमा होमिएका मकवानपुरका युवाहरूमध्ये केहीले उतै ज्यान गुमाउने क्रम रोकिएको छैन ।
पछिल्लोपटक २१ माघ २०८० मा मकवानपुरगढीका एक युवकले मलेसियामा ज्यान गुमाए । घरको कमजोर आर्थिक अवस्था उकास्न मलेसिया पुगेका थिए, मकवानपुरगढी–५ का माधव ढुंगाना ।
घरको जेठो छोराको जिम्मेवारी काँधमा बोकेर २५ वर्षको उमेरमै वैदेशिक रोजगारीका लागि मलेसिया गएका माधवको शव बाकसमा फर्किंदा गाउँ शोकमग्न बन्यो ।
मकवानपुरस्थित आप्रवासी स्रोत केन्द्रका अनुसार माधव जस्तै मकवानपुरका १९३ जनाले २०६५ सालदेखि २०८० को फागुनसम्म वैदेशिक रोजगारीको क्रममा ज्यान गुमाएका छन् ।
आप्रवासी स्रोत केन्द्र सञ्चालन गरिरहेको सुरक्षित आप्रवासन (सामी) परियोजनामा विगत १० वर्षमा वैदेशिक रोजगारीमा गएका मकवानपुरका ६२ जना बिरामी तथा अंगभंग भएको तथ्यांक छ ।
त्यस्तै २०७५/७६ मा बागमती प्रदेशका ९७ जनाको मृत्यु भएको सामी परियोजनाले जनाएको छ । २०७६/७७ मा ९५ जना, ०७७/७८ मा १६९ जना, २०७८/७९ मा १६९ जना र २०७९/८० मा १२५ जनाको मृत्यु भएको जनाइएको छ ।
मकवानपुरबाट गत आर्थिक वर्ष २०७९/८० मा १३ हजार १०१ जना वैदेशिक रोजगारीमा गएको आप्रवासी स्रोत केन्द्रले जनाएको छ ।
जिल्ला प्रशासन कार्यालय मकवानपुरबाट गत आर्थिक वर्षमा २३ हजार ३८३ जनाले राहदानी लिएका थिए । चालु आव २०८०/८१ को फागुनसम्म ६ हजार ३५० जनाले राहदानी लिएका छन् । मकवानपुरबाट चालु आवको फागुनसम्म ७ हजार ६४७ जनाले पुनः श्रम स्वीकृति लिएको र ५ हजार ३३७ जनाले नयाँ श्रम स्वीकृति लिएको तथ्यांक छ ।
सामी परियोजनाले विदेश जान चाहनेलाई आवश्यक सूचना तथा परामर्श, विदेशमा रहेकाको परिवारलाई वित्तीय शिक्षा तथा मनोसामाजिक परामर्श दिइरहेको छ । सामी परियोजना मकवानपुरकी संयोजक अञ्जिता थापा मगरले वैदेशिक रोजगारीबाट फर्किएकाबाट सूचना तथा अनुभव आदानप्रदानको लागि समुदायस्तरका कामसमेत गरिरहेको बताइन् । विदेशमा काम गर्दा सुरक्षित हुने तरिकाबारे पनि परियोजनाले प्रशिक्षण दिंदै आएको छ ।
‘सामी परियोजनामार्फत वैदेशिक रोजगारीमा जानुअघि आवश्यक सीप, भाषालगायतको तयारीबारे परामर्श दिने गरिएको छ,’ मगरले भनिन्, ‘वैदेशिक रोजगारीबाट फर्केकाहरू र वैदेशिक रोजगारीमा रहेकाहरूको परिवारलाई वित्तीय साक्षरता कक्षामार्फत आर्थिक व्यवहार परिवर्तन, पारिवारिक बजेट, फजुल खर्च कटौती जस्ता कार्यमा प्रोत्साहित गर्दै आएका छौं ।’
– यस समाचारको श्रोत : Online Khabar हो ।