व्यङ्ग्य : रुम मिलाउँछु
१. पहिलो हप्ताको समाचार ।
फलानो ‘कुमान्छे’ ले ढिस्कानो व्यवसायीसँग चिलानो सामान खरिदमा गरेको बार्गेनिङको अडियो सार्वजनिक ।
व्यवसाय, ठेक्कापट्टा, उद्यम, मन्त्री, सांसद, सरकारी जिम्मेवारी केही नभएका फुर्सदी तर ‘सबैका लागि चाहिने’ कु-मान्छे ।
– सुन्नै नसकिने वार्तालापहरू
“एयरपोर्टमा सामान आइपुगेको छ ।”
“पख्नोस् म रुम मिलाउँछु ।”
०००
“त्यो सामान तपाईंले भन्सार पास गराइदिनुपर्यो ।”
“ठिक छ त, म रुम मिलाउँछु ।”
०००
“सामान खरिद गर्दा ज्यादै खर्च भयो । हजुरको भागमा यो पटक अली थोरै हुन्छ है हजुर । पछि मिलाउँला ।”
“हुन्छ तर पहिले म रुम मिलाउँछु ।”
२. दोस्रो हप्ताको समाचार ।
शङ्कास्पद आरोपमा अनुसन्धान सुरू ।
‘कुमान्छे’ प्रेसर, सुगर र मुटुमा समस्या देखा परेपछि अस्पताल भर्ना ।
बिहानमा सुरक्षाका बन्दोबस्त, दिनमा कमिशनवालाको सुरक्षित भेट ।
फोनमा वार्तालापः
“समाचारअनुसार त बिरामी पर्नुभयो रे त ?”
“रुम मिलिसकेको छ आउनोस् ।”
(केही मिनेटमा भेट)
“उहाँ जहिल्यै रुम मिलाउँछु मात्रै भन्नुहुन्थ्यो, पूरै अस्पतालै खाली गराउनु भएछ त । आउनोस् काउन्टरमैँ बसेर हरहिसाब गरौँ ।”
(अस्पतालले खतराका बिरामी अन्यत्र रिफर, अन्यलाई डिस्चार्ज । अस्पताल खाली ।)
३. तेस्रो हप्ताका केही समाचारहरू ।
– थप उपचारका लागि विशेष विमानबाट कुमान्छे दिल्ली प्रस्थान ।
– सिङ्गै गाउँमा युवा छैनन् । विमानस्थलमा वियोगको रुवाबासी ।
– विदेश पढ्न जाने विद्यार्थी भन्छन्- विदेशमा जुनसुकै काम गरे पनि कामको सम्मान हुन्छ ।
– नेपालमा युवा घट्दै तर तस्करीको ट्रान्जिट बन्दै ।
०००
यतिखेर ‘राष्ट्रिय रुम सेटिङ कम्पनी’ का साहुहरू ‘अन्तर्राष्ट्रिय रुम सेटिङ’ मा व्यस्त ।
जदौ ।
(सहसचिवः सिस्नुपानी नेपाल मकवानपुर)
– यस समाचारको श्रोत : Online Khabar हो ।