शहीद गोविन्द गौतमको परिवारलाई फिल्म ‘काँडेतार’को आर्थिक सहयोग

काठमाडौं । शहीद गोविन्द गौतमको घर कञ्चनपुरको पुनर्वास पुगेर फिल्म ‘काँडेतार’ले उनको परिवारलाई आर्थिक सहयोग प्रदान गरेको छ । फिल्मको च्यारिटी प्रदर्शनबाट संकलित रकमबाट ५० हजार रुपैयाँ शहीद गौतमको परिवारलाई प्रदान गरिएको निर्माता तथा निर्देशक नवल खड्काले जानकारी दिए ।

केही दिनअघि गौतमको पुनर्वासस्थित घरमा पुगेको फिल्मको युनिटले उनका बाबुआमालाई भेटेर सहयोगी हात बढाएको हो । भारतीय सीमा सुरक्षा बल (एसएसबी)को गोली लागेर २०७३ फागुन २६ गते सीमा विवादमा भएको झडपमा उनको मृत्यु भएको थियो ।

यसअघि पनि गौतमको परिवारलाई फिल्म युनिटले २६ हजार रुपैयाँ सहयोग गरेको थियो । फिल्म ‘काँडेतार’ले भारतले नेपाली सीमा अतिक्रमण गरेको कथावस्तु उठाइएको छ । यो राष्ट्रवादी सन्देश बोकेको फिल्मले शहीद गौतमका सपना पूरा गर्न भूमिका खेल्ने आशा निर्देशक खड्काले व्यक्त गरेका छन् ।

यो फिल्म फागुन २५ गते देशव्यापी रिलिज हुँदैछ । हलमा लाग्नुअघि यो फिल्मको देशव्यापी च्यारिटी प्रदर्शनका लागि खड्का लगायतको टोली देश दौडाहामा निस्किएको छ । खड्काले यसअघि राष्ट्रप्रेममै आधारित भीमदत्त, दशगजा, आवाज जस्ता फिल्म निर्माण गरिसकेका छन् ।

– यस समाचारको श्रोत : Online Khabar हो ।