समता लघुवित्तको एफपीओमा ५० गुणा बढी आवेदन, आज अन्तिम दिन

२० कात्तिक, काठमाडौं । समता घरेलु लघुवित्तको एफपीओमा हालसम्म ५०.५ गुणा बढी आवेदन परेको छ ।

यस कम्पनीको एफपीओमा आज मंगलबार ५ बजेसम्म आवेदन दिन सकिनेछ । सोमबार साँझ ५ बजेसम्म कम्पनीको एफपीओमा कुल ११ लाख ७१ हजार ४६५ जनाले आवेदन दिएको सीडीएस एण्ड क्लियरिङ कम्पनीले जनाएको छ ।

सीडीएससीका अनुसार ती आवेदकले १ करोड ७७ लाख २३ हजार २२० कित्ता सेयर माग गरेका छन् । तर कम्पनीले भने जम्मा ३ लाख ५० हजार ९०४ कित्ता बिक्रीका लागि आवेदन माग गरेको हो । कम्पनीको माग र सोमबार साँझसम्म परेको आवेदनका आधारमा मागभन्दा ५०.५ गुणा बढी सेयरका लागि आवेदन परेको हो ।

कात्तिक १२ देखि कम्पनीको एफपीओमा आवेदन खुलेको हो । अंकित मूल्य १०० मै कम्पनीले एफपीओ खुलाएको हो । हाल बजार मूल्य प्रतिकित्ता ८९७ रुपैयाँ छ ।

अनलाइन प्रणाली मेरोसेयर तथा आफ्नो खाता रहेको बैंक तथा वित्तीय संस्थाका शाखाबाट एफपीओ भर्न सकिनेछ । न्यूनतम १० र अधिकतम १ हजार कित्ताका लागि आवेदन दिन सकिनेछ । एफपीओ निष्कासन तथा बिक्री प्रवन्धकमा मुक्तिनाथ क्यापिटल रहेको छ ।

बैंक तथा वित्तीय संस्थाहरुले सर्वसाधारणमा कम्तीमा ३० प्रतिशत सेयर निष्कासन गर्नुपर्ने प्रावधान छ । सोबमोजिम यस कम्पनीको सर्वसाधारणमा जारी सेयर ३० प्रतिशत नपुगेपछि एफपीओ जारी हुन लागेको हो ।

यस कम्पनीको सर्वसाधारणमा जारी सेयर २६. २० प्रतिशत मात्रै छ । एफपीओ जारीपछि सर्वसाधारण सेयर हिस्सा ३०.५२ प्रतिशत र संस्थापक हिस्सा ६९.४८ प्रतिशत पुग्ने कम्पनीले जनाएको छ । साविकको मनकामना स्मार्ट लघुवित्तलाई प्राप्ति गरेर समता घरेलु लघुवित्त बनेको हो ।

– यस समाचारको श्रोत : Online Khabar हो ।