‘मोदीबेनी’ ट्रेलर : मिथकमा आधारित फिल्ममा रोमान्स र थ्रिलर
काठमाडौं । अभिनेत्री वर्षा सिवाकोटीका लागि २०८१ साल महत्वपूर्ण हुने पक्का छ । यो वर्ष उनको प्रतीक्षित सोसल-कमेडी फिल्म ‘छक्कापञ्जा ५’ रिलिज हुँदैछ । त्यसअघि साउन १८ गते उनको अर्को फिल्म ‘मोदीबेनी’ रिलिज हुनेछ ।
गण्डकी प्रदेशको मिथक परम्परामा आधारित फिल्म ‘मोदीबेनी’को ट्रेलर बिहीबार सार्वजनिक भएको छ । काठमाडौंमा आयोजित पत्रकार सम्मेलनमा निर्माताले यो सोसल ड्रामा फिल्मको ट्रेलर सार्वजनिक गरे । कार्यक्रममा निर्देशक शंकर कोइरालासहित कलाकार वर्षा सिवाकोटी, डेब्यु अभिनेता अमरप्रताप श्रेष्ठ, सरोज खनाल, रेजिना उप्रेती, प्रवीण खतिवडा, कमलमणि नेपाल, जीवन भट्टराई र डेब्यु अभिनेत्री स्नेहा भट्टराई उपस्थित रहे ।
तीन मिनेटभन्दा लामो ट्रेलरले फिल्मको कथावस्तुबारे महत्वपूर्ण प्रकाश पार्छ । कथावस्तु, चरित्र चित्रण र द्वन्द्वको आयाम वरपर ट्रेलर बनेको छ । पर्वत जिल्लाको मोदीबेनी क्षेत्रमा चलिआएको मिथकमा फिल्म आधारित छ । अभिनेता खतिवडाले उक्त क्षेत्रमा चलेको ‘लास उठेर हिंड्ने’ मिथकमा फिल्मको कथा आधारित छ ।
‘लास उठेर हिंडेपछि यसले कस्तो विध्वंश ल्याउँछ, त्यो त फिल्म हेरेपछि थाहा लाग्ला,’ खतिवडाले ‘सिनोप्सिस’बारे भने । ट्रेलर हेर्दा दर्शकलाई थ्रिलर पनि लाग्न सक्छ ।
ट्रेलरमा प्रेम, विवाह सम्बन्धमा आउने उतारचढाव र सामाजिक विषयलाई समावेश गरिएको छ । दिलीप केसीले निर्माण गरेको फिल्ममा सहनिर्माताको रुपमा हरि श्रेष्ठ छन् ।
– यस समाचारको श्रोत : Online Khabar हो ।