संसारकै सफल सिइओ, जसले टाट पल्टिन लागेको कम्पनीलाई विश्वकै तेस्रो ठूलो कम्पनी बनाए
झण्डै टाट पल्टिन लागेको कम्पनीलाई विश्वकै तेसो ठूलो कम्पनी बनाउन सफल व्यक्ति हुन् जेन्सेन हुआङ ।
प्रमुख कार्यकारी अधिकृत जेन्सेन हुआङको नेतृत्वमै एआई चिपमेकर कम्पनी एनभिडिया २ ट्रिलियन डलरको कम्पनी बनेको छ ।
कूल बजार पुँजीकरण २.२२ ट्रिलियन डलर रहेको एनभिडिया माइक्रोसफ्ट र एप्पलपछि विश्वको तेस्रो मूल्यवान कम्पनी हो ।
कम्पनीलाई यो स्थानसम्म ल्याइपुर्याउने प्रमुख श्रेयचाहिँ यसको नेतृत्वलाई जान्छ ।
प्रमुख कार्यकारी अधिकृत हुआङको सफलता उनको अथक काम तथा लगाव, सहभागितामूलक नेतृत्व शैली तथा कार्य संस्कृतिको संरक्षकको भूमिकाप्रतिको समर्पणका कारणले नै सम्भव भएको हो ।
दैनिक १४ घण्टा काम, कर्मचारीसँगको सञ्चारलाई प्राथमिकता दिने हुआङको प्रत्येक दिनको काम बिहान ६ बजेदेखि सुरु हुन्छ । बिहान उठेर व्यायाम गरेसँगै काम सुरु गर्ने उनी प्रायः सप्ताहन्त तथा सार्वजनिक विदाको दिनहरुमा पनि काम गरिरहेका हुन्छन् ।
निकै लामो कार्यघण्टा भएपनि उनले आफ्नो कामलाई आनन्दको रुपमा लिन्छन् र आफूले गरेको कामलाई प्रेम गर्छन् ।
संघर्ष र पीडा भनेको चरित्र निर्माण हो र महानता प्राप्त गर्नका लागि यी कुरा आवश्यक छन् भन्ने उनको विश्वास छ ।
हुआङ अन्य ठूला प्रविधि कम्पनीका सिइओहरु भन्दा फरक यस अर्थमा पनि छन् कि उनले आफ्ना मातहतका कर्मचारीहरुसँगको सञ्चारलाई प्राथमिकता दिन्छन् । स्टाफहरुसँग जोडिइरहनका लागि उनले बेलाबेलामा कम्पनीको क्याफ्टेरियामा खाना खान्छन् र विभिन्न तहबाट ६० वटा प्रत्यक्ष रिपोर्ट लिन्छन् ।
हुआङले कम्पनीभित्र खुल्ला सञ्चारलाई प्रोत्साहन गरेका छन् र कर्मचारीहरुलाई उनीहरुको मनमा रहेका पाँचवटा मुख्य कुराहरु लेखेर पठाउन आग्रह गर्दछन् ।
यो विधिले समस्या समाधानमा सहयोग गर्नुका साथै कर्मचारीहरुलाई सूचनामा समान पहुँच दिएर सशक्तिकरण गर्न सकिन्छ भन्ने उनको विश्वास छ ।
टाट उल्टाइदेखि २ ट्रिलियन डलरसम्मको यात्रा
एनभिडिया कम्पनीको सफलतामा हुआङको नेतृत्व अत्यन्तै महत्वपूर्ण रह्यो । सन् १९९० को दशकको अन्त्यतिर कम्पनी झण्डै टाट पल्टिने अवस्थामा पुगेको थियो । त्यो क्षणलाई बिर्सिन गाह्रो पर्ने हुआङले बताउने गर्छन् ।
तर उनको मार्गदर्शनमा एनभिडिया कम्पनी प्रविधि उद्योगको एक महत्वपूर्ण खेलाडी बनेको छ । एआई एप्लिकेसनमा कम्पनीका चिपहरुको उच्च मागका कारण कम्पनीको व्यापारसँगै शेयर मूल्यमा पनि तिव्र बढोत्तरी हुँदा एनभिडिया विश्वकै तेस्रो मूल्यवान कम्पनी बन्न सफल भएको छ ।
आफ्नो सफलताका बाबजुत हुआङ निकै नम्र तथा नयाँ कामका लागि सदैव अग्रसर रहन्छन् । उनी हरेक दिन चिन्तन गर्दछन् र गम्भीर रहन्छन् । उनी आफू र आफ्ना कर्मचारीहरुको उच्च गुणस्तर तथा कार्यसम्पादनको उत्कृष्टतामा विश्वास राख्दछन् ।
कुनैपनि कम्पनीमा सिइओहरुसँग प्रत्यक्ष रिपोर्टिङको व्यवस्था हुनैपर्छ भन्ने उनको धारणा छ । यसबाट अन्य कर्मचारीमा पनि नेतृत्व विकास, कार्यसम्पादनमा उत्कृष्टता र प्रोत्साहन प्राप्त हुन्छ ।
आफ्नो समयलाई प्रभावकारी रुपमा व्यवस्थापन गर्नका लागि हुआंगले कहिलेकाहीँ आफ्नो तालिकामा रहेका अन्य विभिन्न कामहरुलाई पन्छाएर प्रडक्ट तथा रणनीति योजना निर्माण जस्ता कम्पनीमा दीर्घकालीन प्रभाव पार्ने क्षेत्रहरुमा केन्द्रित हुन्छन् ।
एकजना सिइओका लागि खाली समय निकाल्ने एउटा राम्रो विकल्प नसुत्नु पनि हो भन्ने उनको मत छ ।
हुआङको समर्पण र नेतृत्वले एनभिडियालाई दिग्गज प्रविधि कम्पनी बनाएको छ र हुआङ पनि विश्वका सर्वाधिक धनी व्यक्तिहरुको शीर्ष २० मा पर्न सफल भएका छन् । उनको कूल सम्पत्ति ७३ अर्ब डलर छ । एजेन्सी
– यस समाचारको श्रोत : Online Khabar हो ।
